ژیێ خانەنشینبوونا فەرمانبەران هاتە کێمکرن
ئەڤرۆ نیوز ، زنار تۆڤی:
قانوونا خانەنشینیێ ل عیراقێ هاتە راستڤەکرن، د ڤێ قانوونێ دا ژیێ خانەنشینبوونا فەرمانبەران هاتیە کێم کرن و مووچێ وان ل سالا داهاتیدا دێ هێتە زێدە کرن، لدووڤ بەرپرسەکێ خانەنشینێ هەکە رێكکەفتن ل سەر بودجێ 2020 بهێته کرن ئەو قانوونە دێ هەرێما كوردسانێ ژی ڤەگریت.
دکتۆر ئەحمەد سەفار بڕیاردەرێ لیژنا دارایی ل پەرلەمانێ عێراقێ بۆ باس راگەهاندیە: قانوونا خانەنشینیا ئێکگرتی یا عیراقێ هاتیە راستڤەکرن، ژیێ خانەنشینیێ ژ 63 سالیێ هاتیە كێمکرن بۆ 60 سالیێ، لێ ب تنێ هندەک مامۆستایێن زانكۆیێ و نۆشدار و خەلکێن دیتر نەبیت یێن هاتینە ڤەدەر کرن، کو دێ هەر د ژیێ 63 سالیێ دا هێنە خانەنشین کرن، هه‌روه‌سا كێمترین مووچێ خانەنشینیێ ژی دێ 500 هزار دینار بن.
سەفار گۆت ژی: ل سالا 2020 دێ كار ب ڤێ قانوونێ هێتە کرن و ب ڤێ چەندێ دێ دەلیڤا دامەزراندنێ بۆ 202 هزار كەسان ل سالا بهێت زێدە بیت، ئەڤ قانوونە بۆ هەموو عێراقێ یە و هەرێما كوردستانێ ژی ڤەدگریت و دێ ئەڤ قانوونە ل كوردستانێ ژی هێتە جێبەجێ کرن، هەروەسا ڤێ قانوونێ دادپەروەری تێدا هەیە بۆ كێمكرنا جۆداهیا مووچەی و دێ دەرفەتا دامەزراندنا تازە بۆ گەنجان ژی زێدە کەت.
سەفار ئاشكرا ژی کر: هەر فەرمانبەرەکێ 45 سال بیت و 15 سالان خزمەت هەبیت، دشێت داخوازا خانەنشینیێ بكەت، هەر ل سالا 2014 قانوونا ئێكگرتیا خانەنشینیێ یا ژمارە 9 ل عیراقێ دەرچوویە، لێ ژ ئەگەرێ قەیرانا دارایی هەرێما كوردستانێ نەشیا جێبەجێ بكەت.
