ژ ئەگەرێ نەبوونا مۆلەتا شوفێریێ 150 کەس بۆ دادگەھێ ھاتنە رەوانەکرن
ئه‌ڤرۆ نيوز:
د ئەڤ سالە دا ل سنوری پشکا ھاتنوچوونا قەزا شێخان ژ ئەگەرێ نەبوونا دەستووریا شوفێریێ 153 کەس ژ لایێ پۆلیسێن ھاتنوچوونێ ڤە ھاتنە دەستەسەرکرن و بۆ دادگەھێ ھاتینە رەوانەکرن.
موقەدم جەمال سەعدۆ حەبەش، رێڤەبەرێ پشکا ھاتنوچوونا قەزا شێخان بۆ رۆژناما ئەڤرۆ دیار کر کو د 11 ھەیڤێن بوری دا ل سنورێ پشکا ھاتنوچوونا شێخان ژ ئەگەرێ نەبوونا دەستووریا ھاتنوچوونێ 153 کەس ژ لایێ پۆلیسێن ھاتنوچوونێ ڤە ھاتینە دەستەسەرکرن و ئێکسەر بء دادگەھا شێخان ھاتینە رەوانەکرن و ژ لایێ خوە ڤە دادگەە ژی دێ پێرابوونان ل بەرامبەر وان کەسان وەرگریت.
گۆتژی: “پتریا ئەو کەسێن دھێنە دەستەسەرکرن د ژیێ سنێلەیێ دانە، دەمێ بابێ وان ترۆمبێلا خوە ل مال دھێلیت ئەو سنێل ب نھێنی ڤە ترۆمبێلا بابێ خوە دەردئێخن و ل دەمێ روودانەکێ دکەت یان سەرپێچیەکێ یان ژی بکەڤیتە مەفرەزەکا ھاتنوچوونێ ئێکسەر دھێنە دەستەسەرکرن”.
موقەدم جەمال سەعدۆ حەبەش ئاشکەرا ژی کر کو ئەو کەسێن بۆ دادگەھێ ھاتینە رەوانە کرن، ترۆمبێلێن وان ژ لایێ پۆلیسێن ھاتنوچوونێ ڤە دھێنە دەستەسەرکرن ھەتا خودانێ ترۆمبێلێ بھێتە ترۆمبێلێ وەربگریت یان ژی ئەو کەسێ ھاتیە دادگەھکرن ب کەفالەت دھێتە بەردان و ترۆمبێلێ ل گەل خوە دبەت.
رێڤەبەرێ پشکا ھاتنوچوونا قەزا شێخان نەڤەشارت ژی کو رێژا دەستەسەرکرنا کەسێن بێ مۆلەت ئەڤ سالە ژ سالێن بۆری زێدەترە و گۆت: “ئەڤە ژی بۆ ھەبوونا گەلەک ئاواران دزڤریت ل سنورێ قەزا وان”.
ل دووماھیێ ژی داخواز ژ دایک و بابان کر کو ئاگەھداری زارۆیێن خوە یێن دژیێ سنێلەیێ دابن و ترۆمبێلێ نەکەنە د دەستێن وان دا.
