ژ به‌ر كوردان پوتین داخوازيه‌كا ئەردۆگانی رەت کر
ئه‌ڤرۆ نيوز:
سەرۆکێ روسیا و سەرۆک کۆمارێ تورکیا ل باژێرێ سۆچی یێ روسیا ھەڤدیتنەک سازکرن و تێدا ل سەر رەوشا سووریێ، پەیوەندیێن دو ئالی و پاشەرۆژا رۆژھەلاتا ناڤین گەنگەشە کرن و تورکیا ژ روسیا خواست کو پشتەڤانیێ ل ھێرشەکا سەر عەفرینێ بکەت لێ ئەڤ داخواز تورکیا ژ ئالیێ روسیا ڤە ھاتە رەت کرن.
ئاژانسا سپۆتینگ یا روسیا راگەھاند ڤیلادەمیر پوتین سەرۆکێ روسیا و رەجەب تەیب ئەردۆگانێ سەرۆک کۆمارێ تورکیا ل باژێرێ سۆچی یێ روسیا ھەڤدیتنەک سازکرن و د ھەڤدیتنێ دا ھەر دو ئالیان ل سەر رەوشا داویێ یا سووریێ، پەیمانا د ناڤبەرا ئەمریکا و روسیا دا ل سەر چارەکرنا قەیرانا سووریێ ب دیالۆگێ و سازکرنا کۆنگرێ گەلان و پەیوەندیێن ھەر دو ئالیان گەنگەشە کرن.
د کۆمبوونا د ناڤبەرا پوتین و ئەردۆگانی دا، ئەردۆگان داخواز ژ پوتینی کر کو ل دژی یەپەگێ و ھێزێن سووریا دیمۆکراتیک ژی ھەلویست وەربگرن و رێکێ نەدەن کورد د کۆنگرێ گەلێن سووریێ دا پشکداریێ بکەن و د ھەمان دەمی دا سەرۆک کۆمارێ تورکیا داخوازا پشتەڤانیێ ژ روسیا کر بۆ ھێرشکرنا سەر کانتۆنا عەفرینێ و دیار کر یەپەگە ژی وەکو داعشێ و ئەلنوسرا رێکخستنەکا تیرۆرستیە و دڤێت ئەو ھێز بھێتە ژناڤبرن و ل ھەمبەر دا ڤیلادەمیر پوتین سەرۆکێ روسیا ژی راگەھاند کو ئارمانجا وان ل ئدلیبێ نە شەرێ کوردایە و نابیت ب ھێرشا سەر کوردان ئالۆزی زێدەتر بھێنە دژوار کرن و ئۆپەراسیۆنەکا ل دژی یەپەگێ و عەفرینێ رەت کر و راگەھاند کو کۆنگرێ گەلێن سووریێ ب ئارمانجا دروست کرنا ئاشتیا جڤاکیە و دڤێت ھەموو گەل و باوەریێن جودا یێن ل سووریێ پشکداریێ بکەن دا کو کۆنگرێ گەلان بگەھیتە ئارمانجا خوە.
د پشکەکا دی یا کۆمبوونا د ناڤبەرا ھەر دو ئالیان دا چاوانیا پێشخستنا پەیوەندیێن ھەر دو ئالیان ھاتە گەنگەشە کرن و سەرۆکێ روسیا راگەھاند کو پەیوەندیێن وان نھا د ئاستەکی بلند دانە و بازرگانی بزاڤا ئابووری ژ سالێن بۆری گەلەک زێدەتر بوویە و گۆت: (ئەم دخوازین د ھەر واری دا پەیوەندیێن مە ب رەنگەکی ئەرێنی پێشکەڤیت و باشبوونا پەیوەندیێن مە مفایەکا مەزن دگەھینیتە سووریێ و رۆژھەلاتا ناڤین ب گشتی).
رەجەب تەیب ئەردۆگانێ سەرۆک کۆمارێ تورکیا ژی د پرێس کۆنفرانسا پشتی کۆمبوونێ دا راگەھاند کو پەیوەندیێن دو ئالی یێ د ناڤبەرا وان دا بوویە سەدەمێ باشبوونا رەوشا سووریێ و باوەریا ب چارەکرنا قەیرانان زێدەتر کریە و گۆت: (ئەز وەسا باوەر دکەم دێ د ھەر واری دا پەیوەندیێن مە گەلەکێ باشتر ببن و دێ بگەھیتە ئاستەکی ستراتیژیک و ئەم کار دکەین دا کو ل گەل روسیا پێکڤە ببینە ھێزا چارەکرنێ ل دەڤەرێ و دشێم بێژم بۆ ڤێ یەکێ ژی مە گەلەک پێنگاڤێن مەزن ھاڤێتینە).
د ڤێ مژارێ دا رۆژنامێن روسیا راگەھاندن کو ئەردۆگان بلەز داخوازا کۆمبوونەکا تایبەت ل گەل ڤیلادەمیر پوتین سەرۆکێ روسیا کریە و ئارمانجا ئەردۆگانی ئەڤ بوو کو سەرۆکێ روسیا رازی بکەت دا ھێزێن تورکیا و کۆمێن چەکدارێن سەر ب وێ ڤە دەربازی کانتۆنا عەفرینێ ببن و شەرێ ھێزێن کوردی بکەن لێ پوتینی ئەڤ داخوازا ئەردۆگانی رەت کریە و ژ ئەردۆگانی خواستیە کو تورکیا ل دووڤ رێککەڤتنا ئدلیبێ گرێدای بمینیت و بۆ نەمانا ئەلنوسرا خەباتێ بکەت).
ھەروەسا د راگەھاندنا تورکیا دا ژی ھاتە دیار کرن کو ئەردۆگانی سۆزا دانا ساروخێن (S400) ژ پوتین وەرگرتیە و ھەر دو ئالی ل سەر ئۆپەراسیۆنەکا ل دژی کانتۆنا عەفرینێ رێککەڤتنە، لێ د پرێس کۆنفرانسا ئەردۆگان و پوتینی دا دەرکەڤت ھۆلێ کو روسیا ب دژواری ھێرشا ل سەر عەفرینێ رەت کریە و دیار کریە کو دڤێت تورکیا رۆلەکا ئەرێنی بگێریت بۆ ئاشتیا جڤاکی ل سووریێ و دیتنا چارەکا سیاسی کارێ سەرەکی یێ ھەر دو ئالیان بیت.
