ژ به‌ر ڤى ئه‌گه‌رى زره‌ده‌شتى مريێن خوه ل مال ڤه‌دشێرن
ئەڤرۆ نیوز، نەوزاد ھلۆری:
نوونەرا زەردەشتیان ل وەزارەتا ئەوقاف و کاروبارێن ئاینی یا حوکمەتا ھەرێما کوردستانێ دیارکر کو ئەڤە ژ سالا 2016 ئەو داخوازا گورستانەکا تایبەت ب زەردەشتیان ل کوردستانێ دکەن، بەلێ ھەتا نوکە بەرسڤا وان نەھاتیەدان و ژ بەر ڤێ پشکەک ژ زەردەشتیان مریێن خوە ل مالێن خوە ڤەدشێرن.
ئاوات حسامەدین، نوونەرا زەردەشتیان زێدەتر گۆت: (زەردەشتیان ژی مینا ئاینێن دى یێن کوردستانێ فەرمیبوونا خوە ھەیە و خەلکەکێ زۆر پابەند و پێگریێ پێ دکەت، ژ بەر ڤێ پێدڤی یە بارەگا و پەرستگەەـ و گورستانێن تایبەت ب خوه ڤە ھەبن، ب مەرەما ڤێ یەکێ ژی چەندین جاران مە داخوازی ژ جھێن شولەژێ کریە کو پەرستگەهـ و گورستانەکا تایبەت ب زەردەشتیان بھێتە چێکرن، دا کو ل دەما وەغەرکرنا وەلاتی و کەساتیێن زەردەشتی ل وێ گورستانێ بھێتە ڤەشارتن، بەلێ ھەتا نوکە چو بەرسڤ نینن، ئەڤ یەک ژی بوویە ئەگەر کو ل دەما وەغەرکرنا کەسایەتی و وەلاتیێن زەردەشتى پشکەک ژ زەردەشتیان مریێن خوە ل مال ڤەشێرن و پشکەکا دن ژی ل گورستانێن موسلمانان ڤەدشێرن).
نوونەرا زەردەشتیان د درێژاھیا ئاخفتنێن خوه دا دیارکر ژی کو پرانیا زەردەشتیان ل سەر شێوە و رێنمایێن موسلمانان ل مزگەفتان دھێنە شوشتن و کفنکرن و ڤەشارتن و زێدەتر گۆت: (مەترسی ھەیە کو گورێن زەردەشتیان د ناڤ گورستانێن دى بھێنە شکاندن، بەلێ ئەگەر گورستانەکا تایبەت بھێتە چێکرن دێ باشتر بیت ب تایبەتی ئەم دزانین گو ئەرد ژی ھەیە، پێدڤی یە ل ھەموو باژێرێن کوردستانێ گورستان ب زەردەشتیان بھێنە چێکرن، بەری چەندەکێ، ئێک ژ بیرمەندێن زەردەشتیان وەغەکر و ژ بەر نەبوونا چو گورستانێن تایبەت ب زەردەشتیان ڤە، تەرمێ وی ل مالا وی ھاتە ڤەشارتن، به‌ھانا حوکمەتێ ژی تنێ قەیرانا دارایی و نەبوونا پارەى یە).
ل ھەرێما کوردستانێ د ناڤبەرا 250 بۆ 300 ھزار زەردەشتيان ل ھەرێما کوردستانێ ھەنە و پرانیا وان ژی دکەڤنە پارێزگەھا سلێمانيێ، ھەشت ئاینان ل کوردستانێ فەرمی بوونا خوە ھەیە و دشێن ب ئاوایەکێ ئازاد چالاکیێن خوە بکەن.
