ژ بەر خرابیا رەوشا حەجیێن ھەرێمێ، پەرلەمان دێ ئەڤرۆ لێپرسینێ ل گەل وەزیرێ ئەوقافێ کەت
ئەڤرۆ نیوز:
ئەندامەکێ لیژنا ئەوقافێ ل پەرلەمانێ کوردستانێ ئاشکرا کر ئەڤرۆ چارشەمبی ١٦/٩/٢٠١٥ لیژنا وان ل دۆر رەوشا خرابا حەجیێن کوردستانێ دێ لێپرسینێ ل گەل وەزیرێ ئەوقانێ کەت، چونکی ل گۆر وان بێزانینێن گەھشتینە وان کو بەلگەژی ل بەردەست ھەنە رەوشا حەجیێن کوردستانێ ل عەرەبستانا سعودیێ ژ ئالیێ خزمەتگوزاریان ڤە زۆرا خرابە.
ئەنەس محەمەد شەریف ئەندامێ لیژنا ئەوقافێ ل پەرلەمانێ کوردستانێ بۆ رۆژناما ئەڤرۆ دیار کر کو ل گۆر وان پێزانینان جھێ بۆ ئاکنجیا حەجیێن ھەرێما کوردستانێ ھاتیە کرێکرن وانەیێ گونجایە، ب ئاوایەکی ٢٤ ھزار حەجیێن ھەرێمێ د ئێک ئاڤاھی ڤە ھاتینە ئاکنجیکرن و ھەمی ب رێکا چەند مەسعەدان ھاتنوچوونێ دکەن، ھەتا کو حەجی ب سەعەتا ل ھیڤیا مەسعەدان دمینن و حەجی ١٠ قاتان سەر دکەڤن ژ نوو ب مەسعەدان دچنە جھێن خوە و گۆت “ئاڤاھی ھێشتا ژ دروستکرنێ ب دووماھی نەھاتیە و نھا ژی کار ل سەر دھێتەکرن، ھەتا وەختێ باران ژی ھاتیە ئاڤ چوویە د ژوورێن وان ڤە”.
ئەنەس محەمەد شەریف خویا ژی کر ئەڤ ئاڤاھیە ژ ئالیێ وەزارەتا ئەوقافێ ڤە ھاتیە کرێکرن، ل دەمەکی وەزیرێ ئەوقافێ دگۆت “ئەم یێن ھاتین کو گەندەلیێ نەھێلین ھەتا کو ملیۆنەک و ٧٠٠ ھزار دۆلار ژ خانیێن بۆ حەجیان دھاتنە کرێکرن مە یێن زڤراندینە خزینا حوکمەتێ” ب وێ ھێجەتێ کو ئەڤ سالە ئەرزانتر جھێ ڤەحەویانا حەجیان کرێ کریە، لێ ھەتا نھا ئەو پارە ژی نەیێ دیارە و گۆت “ئەڤجا ژ بەر گازندێن حەجیان و وی پارێ نەدیار ئەڤرۆ وەزیرێ ئەوقافێ دێ ھێتە گازیکرن بۆ لیژنا ئەوقافێ یا پەرلەمانێ کوردستانێ، داکو ل دۆر ڤی بابەتی لێپرسین ل گەل بھێتەکرن”.
ئەندامێ لیژنا ئەوقافێ ل پەرلەمانێ کوردستانێ ئاشکرا ژی کر کو نیاز ئەو بوو چار پەرلەمانتار بچنە حەجێ، لێ مخابن ھندەک ئالیان چوونا وان کرە جھێ مزایداتێن سیاسی، ھەرچەندە ب نڤیسار وەزیرێ ئەوقافێ رازی بوو، لێ ل نڤیسارا خوە پەشیمان بوو و گۆت “١٨٨ کەس ئەڤ سالە وەکو ئیفاد یێن چووینە حەجێ سەر ب وەزارەتێن ئەوقاف و ساخلەمیی و راگەھاندن و ژ ئەنجومەنێ وەزیرانن”.
