ژ بەر سیاسەتا PYD ب سەدان گەنجێن رۆژئاڤا رەڤینە تورکیا
ئەڤرۆ نیوز:
رێکخراوا چاڤدێریا مافێ مرۆڤی یا سووریێ د راپۆرتەکێ دا دیار کریە کو د ناڤا دو مەھان دا ١٥٠ گەنجێن کورد یێن رۆژئاڤایێ کوردستانێ ژ بەر سیاسەتا پارتیا ئێکەتیا دیموکراتیک ل سووریێ رەڤینە و چووینە تورکیا.
د بەردەوامیا راپۆرتێ دا ھاتیە دیار کرن کو سیاسەتا وەرگرتنا باجێ ژ خەلکێ، ب زۆرێ برنا بۆ سەربازیێ و گەلەک خالێن دی وەسا کریە کو گەنج نەرازیبوونا خوە ل ھەمبەر وێ یەکێ دیار بکەن و چ رێ ل پێشیا وان نینە و ئەو ژی نەچارن ب رێیا قەچاغی دەربازی تورکیا ببن و پاشی ژی بەرێ خو بدەنە وەلاتەکێ دی.
د بەردەوامیا راپۆرتێ دا ھاتیە دیار کرن کو PYD رێ نادەت چو پارتێن دی یێن رۆژئاڤایێ کوردستانێ ب رەنگەکێ ئازاد چالاکیێن خوە بکەن و ھەروەسا ژ بەر ھەلویستێ سیاسی گەلەک جاران چالاکڤانێن سیاسی دھێنە گرتن و تووشی ئەشکەنجەدانێ دبن، ژ بەر ھندێ ژی د ناڤا دو مەھێن بۆری دا ١٥٠ گەنجان بەرێ خوە داینە تورکیا و ھەکە سیاسەتا وێ پارتیێ ل رۆژئاڤایایێ کوردستانێ وەسا بەردەوام بیت دێ چوونا گەنجان ژی بەردەوامیا خوە ھەبیت و رەنگە زێدەتر ژی ببیت.
