ژ بەر لیبیا پەیوەندیێن تورکیا و روسیا ئالۆز بووینە
ئەڤرۆ:
کەریم ھاس بسپۆرێ کاروبارێن سیاسی راگەھاند کو سەرۆک کۆمارێ تورکیا رەجەب تەیب ئەردۆگان بەری دو رۆژان ب رێیا تەلەفونێ ل گەل پۆتین ئاخڤیە و نەرازیبوونا خوە ل ھەمبەر ھەلویستێ روسیا ل دۆر روودانێن ڤێ دووماھیێ ل لیبیا دیار کریە و پۆتین ژی ب رەنگەکێ ئاشکرا بۆ ئەردۆگانی دیار کریە کو دڤێت تورکیا ھێزێن خوە ژ لیبیا ڤەکێشیت، چونکو ھەبوونا ھێزێن تورکیا ل لیبیا بوویە ئاریشەکا گەلەک مەزن و دڤێت تورکیا ببیتە پشکەک ژ چارەسەریا سیاسی ل لیبیا و سەربازێن خوە ژ لیبیا ڤەکێشیت.
د. کەریم ھاس دیار ژی دکەت کو پشتی مسرێ و سعوودیێ ل گەل چەندین وەلاتێن دی یێن عەرەبی پەیوەندیێن خوە ل گەل روسیا باشتر لێ کرینە نھا روسیا ژی نەچارە ل دۆر لیبیا ھەلویستێ خوە ب گوھۆریت و وەکو جاران ل ھەمبەر دەستێوەردانێن تورکیا بێدەنگ نەبیت، چونکو وەلاتێن عەرەبی ژ بەر بابەتێ لیبیا ژ ھەلویستێ روسیا دلگران بوون و روسیا ژی دڤێت ھەلویستێ خوە ل دۆر رەوشا لیبیا ب گوھۆریت و ئەو یەک ژی ب دلێ تورکیا نینە.
ناڤھاتی دیار دکەت کو تورکیا ژ ھندێ دترسیت کو گوھۆرینا ھەلویستێ روسیا تنێ ل دۆر لیبیا نەبیت و پاشی روسیا داخوازا ھندێ ژی ژ تورکیا بکەت کو دڤێت ھێزێن خوە ژ سووریێ ژی ڤەکێشیت.
