ژ بەر نەبوونا خزمەتگوزاریان تاخێن نوو ل بەردەرەش ناھێنە ئاڤاکرن
ئەڤرۆ نیوز، رەزوان رۆژبەیانی:
ئەندازیار عومەر میکایل سەلیم سەرۆکێ باژێرڤانیا قەزا بەردەرەش بۆ ئەڤرۆ نیوز خویاکر کو ھەتا نوکە دو ھزار پارچێن ئەردی ب سەر فەرمانبەران و وان کەسێن کو ھەژی ئەردینە ھاتینە دابەشکرن و نوکە چار تاخێن نوو ھاتینە ڤەکرن، بەلێ ژ بەر نەگەھاندنا خزمەتگوزاریان وەکو ئاڤ و کەھرەب و رێک و سولین، خەلک ناچن کو ئاڤاھیان تێدا دروست بکەن.
گۆتژی: “ئەڤێ ژی کاتێکرن کریە سەر بەرفرەھبوونا رووبەرێ قەزا بەردەرەش و خەلک پتر ل ناف سەنتەرێ قەزایێ کۆم بووینە چونکو ل وێرێ ھەموو خزمەتگوزاری ھەنە”.
ئاشکەرا ژی کر کو ب نەخشە و پلان بەردەرەش بەرفرەە بوویە، بەلێ ل د ژیواری دا چو فرەھی تێدا نیە ئەڤە ھەموو بۆ نەبوونا شیان و بۆدجا ل بەردەستێ وان دزڤریت، چونکو بوودجەکێ گەلەک پێ دڤێت ھەتا ئەو بشێن کارێ خوە بکەن ئەو بوودجە ل بەر دەستێ وان نیە.
ئەندازیار عومەر میکایل سەلیم گۆت: “وەکو باژێرڤانی ھەندەک داھات ھەنە بەلێ ل دووڤ رێنمایان ئەم نەشێین دەستکاریێ تێدا بکەین ئەم وان داھاتان دھنێرینە دارایی و 17% ژ وی داھاتی دێ بۆ مە زڤریت ئەو ژی گەلەک گیرۆ دبیت ھەتا دگەھیتە بەردەستێ مە ئەو داھات ژی وەکو پێدڤی نیە کو ئەم بشێین خزمەتگوزاریان بگەھینینە تاخێن نوو، ژ بەر وێ چەندێ وان ئاستەنگان کو مە بەحس کری داخواز ژ حوکمەت و لایەنێ پەیوەندیدار دکەین کو بوودجەکێ بۆ بەرفرەھبوونا قەزا بەردەرەش دابین بکەت دا کو ئەم بشێین پێ خزمەتا وەلاتیان بکەین چونکو بەردەرش قەزایەکا نوویە و پێدڤی ب گەلەک بوودجە و خزمەتان ھەیە”.