ژ بەر پۆستێ سەرۆک کۆماری ئێکەتی یا ئاریشا بۆ ھەلبژارتنێن کوردستانێ چێ دکەت
ئه‌ڤرۆ نيوز:
شرۆڤەکارەکێ سیاسی دبێژیت، پارتی ژبەر بجە ئینانا بنەمایێن دیموکراسیێ پێداگیریێ ل سەر رێڤەچوونا ھەلبژارتنێن پەرلەمانێ کوردستانێ کەت، مەرەما ئێکەتیێ بتنێ پیلانەکە بۆ وێ چەندێ پارتی پۆستێ سەرۆک کۆماری بدەنە ئێکەتیێ.
عەبدولسەلام بەرواری، شرۆڤەکارێ سیاسی بۆ رۆژناما ئەڤرۆ گۆت” ئەنجامدانا ھەلبژارتنێن پەرلەمانێ کوردستانێ ئێکلابوویە و پاشخستنا ھەلبژارتنان چو ل بابەتی ناگۆھۆڕیت ژبەر کو پارتی یا پشتڕاستە ل رێبازو جەماوەرێ خوە، ب دیتنامن یا شەخسی ئەف گوت گوتکێن دھێنە بەلافکرن ھەلبژارتن ناھێنەکرن کو نوکە بانگەشێ ژی دەستپێکریە، ئەڤە بتنێ یاریەکە ئێکەتی یا دکەت و دەستێ وان یێ ئاشکرەیە، مەرەما ئێکەتیێ ئەو نینە پڕۆسا ھەلبژارتنێن 30ی ئیلوونێ بھێنە پاشخستن، بەلکو ئێکەتی دخوازیت بوێ مەرەما خوە پۆستێ سەرۆک کۆمارێ عێراقێ بۆ خوە زامن بکەت، واتە ئێکەتی یا دبێژیت یان پۆستێ سەرۆک کۆماری بدەنە من یانژی دێ ئاریشان بۆ ھەلبژارتنێن پەرلەمانی چێکەین، ھەکە بابەتێ پۆستێ سەرۆک کۆماری بۆ ئێکەتیێ ئێکلا ببیت، ئەڤە ئێکەتی دێ شەڕێ ڤی خەلکی بکەن یێن بەحسێ پاشخستنا پڕۆسا ھەلبژارتنان دکەن، پارتی دیموکراتی کوردستان چو مەرەم و بەرژەوەندیێن تایبەت و حزبی نینە دەمێ پێداگیریێ ل سەر رێڤەچوونا ھەلبژارتنان دکەت، تنێ پارتی یا رژدە لسەر بنەمایێن دیموکراسیێ بھێنە بجە ئینان لھەرێما کوردستانێ و سەرۆک بارزانی بخوە ب رۆھنی گوت، مە چو مەرەم نینە وەکی ھندەک لایەنێن سیاسی دبێژن پارتی ژبەر ھندەک بەرژەوەندیێن خوە یا پێداگیریێ لسەر رێڤەچوونا ھەلبژارتنان دکەت، نەخێر پارتی ژبەر ھەرێما کوردستانێ یە.
ئەڤی شرۆڤەکارێ سیاسی دیارکر” ئەنجامدانا ھەلبژارتنان تنێ بنەمایێ دیموکراسیێ نینە، بەرۆڤاژی رێزگرتن ل بنەمایێن دیموکراسیێ پێگیریە ب ژڤانێ ھەلبژارتنان ددەمێ خوەدا، بەھانەیا ھندەک لایەنا بۆ پاشخستنا ھەلبژارتنێن کوردستانێ ئەڤە ئەم خوە بگرین ھەتا حوکمەتا نوویا بەغدا بھێتە پێک ئینان .
ل دۆر سەرەدانا نێچیرڤان بارزانی و شاندێ بلندێ پارتی و کۆمبوون گەل لایەنێن نەڕازی عەبدولسەلام بەرواری گۆت” پارتی ددەمێ ھندەک لایەنان دژوار ترین ھەلویست ھەمبەر پارتی ھەبویە، تنێ ھزرا پارتی ئەڤەبویە بەرژەوەندیێن نیشتیمانی و نەتەوەیی بەرچاف بھێنەگرتن و بتایبەتی لھەمبەر بەغدا ئێکگرتی بن، ئەڤان لایەنان بڕیار دابو دگەل پارتی دانوستانا نەکەن، بەلێ نوکە پارتی بڤان سەرەدانێن خوە ڤێت باوەریێ بۆ ئەڤان لایەنان چێکەت ھەگەر پارتی ل بەغدا یا بھێزبیت ھەموولایەن دێ بھێزبن، پارتی حزبەکە لسەر ئاستێ دەڤەرێ یا ژمارە و حساب بۆ تێتەکرن، ئەز باوەرم دانوستان دگەل لایەنێن بەری نوکە دژی پارتی بوون پێنگاڤەکا باش و دبلۆماسیە، ھەروەسا بۆ ئەڤان لایەنانژی زۆر بابەت دێ رۆھن بوون، کو بەری نوکە بەغدا ھزرەکا وەسا ئێخستبو مەژیێ وان دژی پارتی دھاتنە ھاندان نوکە ئەف لایەن یێ دبینن حوکمەتا ھەرێما کوردستانێ زۆر سەرکەفتی ترە ژ یا بەغدا.
