ژ بەر ڤی ئەگەری کارەبا ھەرێمێ دێ گران بیت
ئەڤرۆ نیوز:
وەزارەتا کارەبا ھەرێما کوردستانێ دیار کر، کار ل سەر پلانەکێ دھێتەکرن بۆ گرێدانا توڕا کارەبا ھەرێمێ د گەل وەلاتێن جیران و ل داھاتی دێ کارەبا ھەرێمێ ل وەلاتێن تورکیا و سووریا و ئیرانێ ھێت، ھەروەسا ڕاگەھاند: “د دەمێ ب جھئینانا سیستەمێ تێکەلکرنا کارەبێ د گەل وەلاتێن جیران دێ بھایێ کریا کارەبێ گرانتر لێ ھێت.
محەمەد ئەمین ھەورامی، پەیڤدارێ وەزارەتا کارەبا حوکمەتا ھەرێما کوردستانێ بۆ رۆژناما ئەڤرۆ گۆت: “وەزارەتا مە نوکە مژوولی پلانەکێ یە بۆ گرێدانا توڕا کارەبا ھەرێما کوردستانێ ب توڕا کارەبا وەلاتێن دەوروبەر ڤە و پێنگاڤ ژی بۆھاتینە ھاڤێتن، مە ھێلا زاخۆ و تورکیا ھەیە و ھێلەکا نێڤدەولەتیە دێ مفای ژێ وەرگرین، ھەروەسا ل کرماشانا ئیرانێ راستەوخۆ بۆ سلێمانیێ دێ کارەب ھێتە ڕاکێشان، ئەڤ پلانە نوکە یا بەرھەڤە و کار یێ ل سەر دھێتەکرن، بۆ داھاتی ھەرێم دێ کارەبێ ل تورکیا، ئیران و سووریێ کڕیت، بەلێ پێدڤی ب ھێلێن کارەبێ ھەنە شیانێن ڤەگوھاستنا رێژەیەکا زۆرا کارەبێ ھەبیت”.
ھەورامی ئاماژە ب وێ چەندێ ژی کر، بۆ ڤێ مەرەمێ وان دانوستان د گەل وەزارەتێن کارەبا وەلاتێن دەوروبەر کریە و گۆت: “بەری نوکە ژی مە کارەب ل تورکیا و ئیرانێ کڕیە، بھایێ کڕینا کارەبێ ل وەلاتێن جیران زۆر گرانترە ل ھەرێما کوردستانێ، ئەگەر بھێت و ئەڤ پلانە بکەڤیتە کای بۆ تێکەلکرنا کارەبێ د گەل وەلاتێن جیران، ئەڤە بێگومان وی دەمی دێ بھایێ کریا کارەبێ گرانتر لێ ھێت ل سەر وەلاتیان و پارەیەکێ زۆرتر ژ نوکە دێ ژ وەلاتیان ھێتە وەرگرتن”.
