پشتى بۆرينا هه‌يڤه‌كێ ژ شه‌رێ ئازادكرنا مووسل 62 هزار كه‌س يێن ئاواره بووين
ئه‌ڤرۆ نيوز:
زێده‌ترى 62 هزار كه‌سان ل سنورێ پارێزگه‌ها نه‌ينه‌وا ئاواره‌ى باژێرێن دى يێن عيراقێ بووينه و ئه‌ڤه ژى ب تنێ د ماوێ ئێك هه‌يڤا ده‌سپێكرنا شه‌رێ ئازادكرنا مووسل دا.
وه‌زاره‌تا كۆچ و كۆچبه‌رێن حوكمه‌تا عيراقێ د به‌ياننامه‌كێ دا ئه‌ڤرۆ رۆژا شه‌مبى كو دانه‌ك ب ده‌ست ئه‌ڤرۆ نيوز كه‌فتيه راگه‌هاند كو ژ ده‌سپێكا شه‌رێ مووسل هه‌تا نوكه 62 هزار و 399 كه‌س ژ ده‌ڤه‌رێن بن ده‌ستێ داعش ئاواره بووينه.
ب گۆره‌ى ئامارێن وه‌زاره‌تا كوچ و كۆچبه‌رێن عيراقێ د چه‌ند تاخه‌كێن سه‌نته‌رێ باژێرێ مووسل دا سێ هزار و 700 كه‌س ئاواره بووينه و ژ وێ ژمارێ ژى 26 كه‌س ژ ئه‌گه‌رێ ته‌قه و بۆردۆمانا داعش بريندار بووينه.
هه‌ڤده‌م ل گه‌ل وى شه‌رى ل ده‌ڤه‌رێن دى يێن بن ده‌ستێ داعش خه‌لكێ مه‌ده‌نى دره‌ڤن و ب گۆره‌ى ئامارا وه‌زاره‌تا ناڤبرى، د ماوێ وێ هه‌يڤێ دا 150 كه‌س ژ قه‌زا حه‌وێجه يا سه‌ر ب پارێزگه‌ها كه‌ركووك به‌ر ب ده‌ڤه‌رێن ئارام ئاواره بووينه.
ئۆپه‌راسيۆنێن ئازادكرنا مووسل ل 17ى هه‌يڤا بۆرى ب پشكداريا پێشمه‌رگه و هێزێن عيراقێ له‌شكر و سۆپا و حه‌شه‌د شه‌عبى و ب پشته‌ڤانيا ئه‌سمانى يا هه‌ڤه‌يمانێن نێڤده‌وله‌تى ده‌سپێكريه و هه‌تا نوكه گه‌له‌ك ده‌ڤه‌رێن گرنگ هاتينه كونترۆلكرن ژ وان ژى باشيك و فرۆكخانا تله‌عفه‌ر و چه‌ند تاخێن مووسل.
