ژ دو ميحوره‌ان ڤه داعش هێرش كره سه‌ر پێشمه‌رگه‌ى
ئه‌ڤرۆ نيوز:
سپێده‌هيا ئه‌ڤرۆ رۆژا چارشه‌مبى هێزێن پێشمه‌رگێ كوردستانێ ل هه‌ر ئێك ژ ميحوه‌رێن باشيك و داقوق دو هێرشێن چه‌كدارێن داعش تێكشاند.
فه‌رمانده‌كێ مه‌يدانى يێ پێشمه‌رگه‌ى ل چيايێ باشيك بۆ ئه‌ڤرۆ نيوز گۆت: “سپێده‌هيا ئه‌ڤرۆ رۆژا چارشه‌مبى دو خۆكوژێن داعش ڤيا هێرشێ بكه‌نه سه‌ر هێزێن پێشمه‌رگه‌ى، به‌لێ به‌رى نێزيكى هێزێن پێشمه‌رگه‌ى بكه‌ن، هاتنه ته‌قاندن”.
زێده‌تر گۆت: “پشتى وێ ب نيڤ ده‌مژمێرێ هنده‌ك چه‌كدارێن دى يێن داعش هێرش كره سه‌ر هێزێن پێشمه‌رگه‌ى، به‌لێ بێ چ زيان هێزێن پێشمه‌رگه‌ى هێرشا وان تێكشكاند”.
فه‌رمانده‌كێ پێشمه‌رگه‌ى ل ميحوه‌رێ داقوق ژى راگه‌هاند كو شڤێدى چه‌كدارێن داعش بزاڤ كر نێزيكى ئه‌وان خه‌نده‌كان بن يێن پێشمه‌رگه‌ى لێداين، به‌لێ هێزێن پێشمه‌رگه‌ى رێ نه‌دايێ و پشتى شه‌ره‌كێ دو ده‌مژمێرى بزاڤا وان هاته تێكشكاندن.
ئه‌ڤى فه‌رماندێ پێشمه‌رگه‌ى بۆ ده‌زگه‌هێن راگه‌هاندنێ دايه زانين ژى كو ئه‌ڤ هێرشه بێ چو زيان بگه‌هنه هێزێن پێشمه‌رگه‌ى ب دووماهى هات.
