ژ سوبه‌هی پێڤه سه‌مونخانه و نانپێژی دێ زه‌رفێن كاغه‌زی بكارئینن
ئه‌ڤرۆ، حه‌مۆ محه‌مه‌د:
قه‌ده‌غه‌كرنا بكارئینانا زه‌رڤێن نایلۆنی ل سه‌مونخانه و نانپێژیان ل 1/10/2019 دێ هێته ب جهئینان و ل شوینا وان زه‌رڤێن كاغه‌زی دێ هێنه بكارئینان.
جه‌وهه‌ر عه‌لی، قایمقامێ قه‌زا دهۆكێ راگه‌هاند، ل دووڤ نڤیسارا جڤاتا وه‌زیرێن هه‌ریما كوردستانێ ل دۆر قه‌ده‌غه‌كرنا زه‌رڤێن نایلۆنی بۆ كه‌ره‌ستێن خوارنێ یێن گه‌رم وه‌كو (سه‌مون و نان)، كۆمبوونه‌ك ب پشكداریا هژماره‌كا نوونه‌رێن رێڤه‌به‌ریێن په‌یوه‌ندیدار هاته ئه‌نجامدان و بڕیار هاته دان ل 1/10/2019 ل شوینا زه‌رڤێن نایلۆنی، زه‌رڤێن كاغه‌زی ل سه‌مونخانه و نانپێژیان ل باژێرێ دهۆكێ بهێنه بكارئینان.
قایمقامێ قه‌زا دهۆكێ گۆت: “هه‌ر كه‌سه‌كێ پێگیریێ ب ڤێ بڕیارێ نه‌كه‌ت دێ پێرابوونێن قانوونی د راستا وان دا هێنه وه‌رگرتن و سزادان”.
عسمه‌ت سه‌لمان، رێڤه‌به‌رێ پشكا چاڤدێری و سلامه‌تیا خوراكی ل رێڤه‌به‌ریا گشتی یا ساخله‌میا پارێزگه‌ها دهۆكێ ئاماژه ب وێ چه‌ندێ كر كو داگرتنا نانێ گه‌رم د ناڤ زه‌رفێن نایلۆنی دا، كارتێكرنه‌كا مه‌زن ل سه‌ر ساخله‌میا مرۆڤی دكه‌ت، له‌وما پوسته‌ر ل سه‌مونخانه و نانپێژیان دێ هێنه هه‌لاویستن ل سه‌ر مه‌ترسیا زه‌رفێن نایلۆنی.
عسمه‌ت گۆت: “مێزگه‌ردێن ره‌وشه‌نبیری ژ لایێ ساخله‌میا دهوكێ و فه‌رمانگه‌ها ژینگه‌هێ ڤه ل دۆر هشیاریا جڤاكی سه‌باره‌ت بكارئینانا زه‌رفێن كاغه‌زی ل شوونا یێن نایلۆنی دێ هێنه بكارئینان”.
