ژ پێخەمەت پۆستێ پارێزگەری، كوردان پترییا پۆستێن ئیداری ل كەركووكێ ژ دەستدان
بەلاڤكرنا پۆستێن ئیداری یێن پارێزگەها كەركووكێ د ناڤبەرا پێكهاتەیاندا ب شێوەیەكێ نەیەكسانە، كورد كو پترییا باژێری نە هەمبەركرن ل گەل نەتەوەیێن دی كێمترین پۆست بەركەفتینە، بەرۆڤاژی پترییا پۆستێن ئیداری ب پێكهاتەیێ ئەرەب هاتینە دان، بەلێ هێشتا چاڤێن وان ل ئەوێ چەندێیە پۆستێن زێدەتر پێ بهێنە دان.
رەعەد سالح، ئەندامێ جڤاتا پارێزگەها كەركووكێ ژ لیستا ئەرەبی دبێژیت» مافێ مەیە پۆستێن زێدەتر وەربگرین، چونكە پشكەكا ئەوان پۆستان مافێن مەیە و هێشتا مە وەرنەگرتینە د دەمەكیدا رێككەفتنا سیاسی یا هەی ل سەر چاوانییا بەلاڤكرنا پۆستان».
پێكهاتەیێ توركمان كو زێدەتر ژ 32% ژ پۆستان پێ هاتینە دان، بەلێ ژ ئەگەرێ ئەوێ نەرازیبوونا وان هەی د بەرهەڤ نینن پۆستان وەربگرن و پڕبكەن و د ئیدارەیا كەركووكێدا پشكداریێ بكەن.
توركیش عزەدین، ئەندامێ مەكتەبا سیاسییا بەرەیێ توركمانی دبێژیت» پێدڤییە هەڤپشكییا راستەقینە ل كەركووكێ بهێتە دیاركرن، بەلێ ل كەركووكێ مافێ توركمانان یێ هاتیە پێشێلكرن، لەوما نەكو تنێ پۆست، بەلكو پێدڤی بوو هەموو دەزگەه ژی ب رێژەیا 32% هاتبانە دابەشكرن».
ب باوەرییا پارتی دیموكراتی كوردستان باشترین چارەسەری د ئەڤێ قۆناغێدا زڤرینی بۆ دابەشكرنا پۆستان ب رێژەیا 32%، چونكە كورد د پێكئینانا ئەڤێ ئیدارەیێدا كێمتر ژ ئەوێ رێژەیێ بەركەفتییە.
