ڤيديۆ: لايه‌نێ هێرش كريه سه‌ر رۆژناما فره‌نسى ناسناما خوه ئاشكرا دكه‌ت
ئه‌ڤرۆ نيوز:
رێكخستيا قاعيده ل گزيرتا عه‌ره‌بى به‌رپرساتيا خوه ژ هێرشيا كريه سه‌ر حه‌فتيناما شارلى ئيبدۆ يا فره‌نسى دياركر و ئاماژه ب وێ چه‌ندێ كر كو ئه‌وان ل سه‌ر داخوازا ئه‌ميرێ كۆمه‌لێ ئه‌يمه‌ن زه‌واهرى ئه‌ڤ كاره كريه.
ئاخفتنكه‌رێ ب ناڤێ رێكخستيێ نه‌سره‌دين بن عه‌لى ئه‌لئنسى د نامه‌كا ڤيديۆيى دا كو ل سه‌ر ئه‌نترنێتێ به‌لاڤ بوويه ل ژێر ناڤێ “بۆ پێغه‌مبه‌رێ خودێ، نامه‌ك ل دۆر داگيركرنا پاريسا مباره‌ك”، دبێژيت: “ئه‌م ل رێكخستيا قاعيده يا جيهادى به‌رپرساتيا خوه ژ ڤێ كريارێ ديار دكه‌ين بۆ پێغه‌مبه‌رێ خودێ سلاڤێن خودێ ل سه‌ر بن”.
ئه‌لئنسى ئاماژه ب وێ چه‌ندێ ژى كر كو يێ نه‌خشه و پلان و پشته‌ڤانيا ڤێ كريارێ كرى، سه‌ركردێن رێكخستيێ بوون وه‌كو بجهئينانا داخوازيه‌كا خودێ بۆ ب سه‌رخستنا پێغه‌مبه‌رێ وى و ل ژێر سه‌رپه‌رشتيا ئه‌ميرێ گشتى شێخ ئه‌يمه‌ن كوڕێ محه‌مه‌د زه‌واهرى و ل ژێر وه‌سيه‌تا ئۆسامه بن لادانى بوو.
دو برايان سه‌عيد و شه‌ريف كواشى 7\1\2015 باره‌گايێ حه‌فتيناما فره‌نسى شارلى ئيبدۆ ل فره‌نسا گوله باران كر و 12 كه‌س تێدا كوشتن.
به‌رى نوكه ڤێ حه‌فتينامێ موسلمانێن جيهانێ گه‌له‌ك تۆره كربوون، ده‌ما رابووين ب به‌لاڤكرنا وێنێن كاريكاتۆرى يێن پێغه‌مبه‌رێ خودێ محه‌مه‌د سلاڤێن خودێ ل سه‌ر بن، ئه‌ڤ كه‌سێن ژ روودانێ رزگار بووين ژى دوهى هژماره‌كا نوو يا حه‌فتينامێ به‌لاڤكر و ل لاپه‌رێ ئێكێ وێنێ پێغه‌مبه‌رێ خودێ محه‌مه‌د (س) دووباره ل به‌رگێ ئێكێ دا بوو.
د ڤێ ڤيديۆيێ دا، ئاخفتنكه‌رێ ب ناڤێ رێكخستيا قاعيده ئاماژه ب وێ چه‌ندێ كريه كو ئه‌و كارێ ئه‌وان كرى دژى پێغه‌مبه‌رێن خودێ بوو و ژ وان ژى محه‌مه‌د كوڕێ عه‌بدولايى (س) و دبێژيت: “هه‌ڤالێن مه ژى ژ بوو سه‌ركه‌فتنا پێغه‌مبه‌رێ خودێ، قوربانى ب خوه دا… سه‌ركه‌فتن يا پێغه‌مبه‌ر و دينێ مه‌يه”.
