ڤيديۆ: ل ئاکرێ 560 تەنێن بەریان ھاتینە کۆمکرن
ئەڤرۆ نیوز ، نەوزاد ھلوری:
ئەڤ سالە ل ھەردو دەڤەرێن ئامێدیێ و ئاکرێ بەڕی بەر ب کێمبوونێ ڤە چووینە، بەلێ ل گەل ڤێ یەکێ ژی زێدەتری 560 تەنێن بەڕیان ھاتینە بەرھەمئینان، دھێنە بکارئینان بۆ خوارنا مرۆڤ و ئالیکێ گیانەوەران، ھندەک ژی دفرۆشن.
زرار سالح وەلاتیەکێ گوندێ دێویکێ یا سەر ب ناحیا شێلادزێ ل سنوورێ قەزا ئامێدیێ یە بۆ ئەڤرۆ نیوز گۆت: (وەکو ھەموو سالان د وەرزێ پایزێ دا ئەم دچینە ئاقاری بەڕیان، ئەم بۆ خوارنا خوە و گیانەوەران ژى بکاردئینین و ھندەک ژی دفرۆشن، بەڕی ل وەرزێ پایزێ دھێنە کۆمکرن و ب رێیا دروستکرنا کوتەل و کوسکان دھێنە ھەلگرتن).
زێدەتر گۆت: (د کەڤن دا ژ بەر کو خوارن کێمبوویە، بەڕی وەکو خوارن و فێقی د شەڤێن زڤستانێ دا ھاتیە بکارئینان و بەڕی شوونا خوارنێ دگریت و ھەڤدەم بۆ گەلەک نەساخیان ژی یا باش و مفادارە، نھا کیلۆیا بەڕیان د ناڤبەرا سێ بۆ چار ھزار دیناران دھێتە فرۆتن و ھندەک ژ وەلاتیان پەنایێ بۆ دبەن و داھاتیەکێ بۆ خوە ب ڤێ رێ پەیدا دکەن).
ئێقبال عومەر وەلاتەکێ دن یێ دەڤەرێ یە ل سەر شێوازێ ب کەلتورکرن و بکارئینانا بەڕیان وەکو خوارن دبێژیت: (د کەڤن دا ژ بەر کو خوارن کێمبوویە و ھەموو کەسان شیان نەبووینە خوارنان بۆ خێزان و زارۆيێن خوە پەیدا بکەن و ژ لایەکێ دن ڤە ل ھندەک دەڤەر و گوندان خوارنا گیانەوەران ژی کێمبوویە و جورە ھشکەسالیەک دروست دبوو، له‌ورا پشت به‌ستن ل سه‌ر به‌ڕيێ دكر).
بەڕی وەکو خوارنا مرۆڤ و گیانەوەران ھاتیە بکارئینان ژ بەر کو بەڕی خوارنەکا ب ھێزە و کارتێکرنێ ل سەر گەشەبوون و قەلەوبوونا گیانەوەران دکەت، بەڕی ب خوە ئێکە ژ بەرھەمێن چیایی و ل ھەموو چیایێن کوردستانێ ھەیە و ل سنوورێ قەزا ئامێدیێ سێ بۆ چار جورێن بەڕیان ھەنە.
ئيقبال زێدەتر گۆت: (دکەڤن دا زێدەباری کو بەڕی وەکو ژێدەرەکێ داھاتی ھاتیە بکارئینان، شێوازەکێ کەلتووری ژی ھەبوویە و بۆ مەرەمێن ساخلەمیێ ژی ھاتیە بکارئینان، ھەڤدەم وەکو فێقی و خوارن ژی ب رێیا تەنیر و کوچکا ھاتیە بەرھەڤکرن و بکارئینان بۆ خوارنێ ژ بەر کو ل وی دەمی خەلک ھەژار بوویە).
ژ لایەکێ دن ڤە ئەحمەد جەمیل ئەبو زێد رێڤەبەرێ چاندنا ئاکرێ دیارکر کو ئەڤ سالە بەڕی ل سنورێ قەزا ئاکرێ بەر ب کێمبوونێ ڤە چوویە و بۆ ئەڤرۆ نیوز گۆت: (ل ڤان سالێن دووماھیێ پێلێن گەرمایێ و کێمبوونا بارانان گەلەک کارتێکرن ل بەڕیا دینارتە و دەڤەرا زێبارێ کریە، بەلێ ل گەل ڤێ یەکێ ژی بەڕی ل دینارتە ل ھەموو گوندان ھەیە و ریکوردا کوردستانێ و پارێزگەھا دھۆکێ د شکێنیت بۆ ھەموو جورێن کەرستەیێن چیایی مینا بەڕی و گووھیشک و کەرستەیێن دن).
زێدەتر گۆت: (سەرەرایی نەبوونا چو سەرژمێریان، بەلێ ل قەزا ئاکرێ ب تایبەتی سنورێ ناحیا دینارتە و دەڤەرا زێبار نێزیکێ 300 دونەمێن عەردێ بەڕیان وەکو رووبەر ھەیە و ئەڤ سالە ھەتا نێزیکێ 600 تەنێن بەڕیان دھێنە بەرھەمئینان، بەلێ ب مخابنی ڤە بازارێ وان گەلەکێ لاوازە و نھا بەڕیا پلە ئێک کیلۆ ب 750 دینار بۆ ھزار دیناران دھێتە فرۆتن وەکو کۆم، بەلێ کیلو ب کت بلندترە).
ل دووماھیێ گۆت: (ل دەڤەرا دینارتە وەلاتیێن دەڤەرێ بەڕیان وەکو تێکەلکرن ل گەل جەھیی بۆ بکارئینانا ئالیکێ ئاژەلان بکارئینن کو ئەڤ یەک ژی پێنگاڤەک ھەری باشە بۆ ب خودانکرنا ئاژەلان، ھەروەسا ھندەک ژی دفرۆشن و ھندەک ژی بۆ خوارنا خوە بکاردئینن).
ھەر چەند چو ئامارێن فەرمی ل ئامێدیێ نینن، بەلێ وەلاتیێن گوندان ددەن دیارکرن کو رەنگە ئەڤ سالە ل سنورێ قەزا ئامێدیێ ھەتا 350 تەنێن بەڕیان ژی بھێنە کۆمکرن ب تایبەتی ل گوندێن بەرێ گارێ و بەرواری بالا و نێروەورێکان.
