نێچيرڤان بارزانى: حوكمه‌تا هه‌رێمێ پلانێن باش بۆ پێشخستنا ئاكرێ و به‌رده‌ره‌ش و شێخان هه‌نه
ئه‌ڤرۆ نيوز:
ئه‌ڤرۆ به‌رێ بنياتێ بۆ رێيا گرنگ و ستراتيژى يا ناڤبه‌را هه‌ولێر و دهۆك ل قه‌زا به‌رده‌ره‌ش هاته دانان، ئه‌و ژى دروستكرنا رێيا جووتسايدێ چه‌مه‌يه كو دكه‌ڤيته ناڤبه‌را رۆڤيا و گۆندێ گۆپال، درێژيا رێ ژى 22كم.
نێچيرڤان بارزانى سه‌رۆكێ حوكمه‌تا هه‌رێما كوردستانێ راگه‌هاند كو ئه‌ڤرۆ به‌رێ بنياتێ بۆ پرۆژێ جووتسايدێ رێيا چه‌مه‌يى هاته دانان ب كوالێتيه‌كا گه‌له‌ك باش.
سه‌رۆكێ حوكمه‌تا هه‌رێما كوردستانێ گۆت: “خه‌لكێ ده‌ڤه‌را ئاكرێ و شێخان و به‌رده‌ره‌ش ده‌ڤه‌رێن هه‌وه جهێ شوره‌ش و پێگه‌هاندنا خه‌باتكه‌ران بوون، ژ به‌ر هندێ ژى ئه‌ڤ ده‌ڤه‌ره ژ لايێ رژێمێ ب ته‌مامى هاتبوونه پشت گوهـ خستن، كو هنده‌ك ده‌ڤه‌ر ژ خزمه‌تكاريێن ده‌سپێكى ژى د بێ به‌هر بوون، حوكمه‌تا هه‌رێما كوردستانێ گه‌له‌ك پرۆژه ل ڤێره ئه‌نجام داينه، به‌لێ ل گه‌ل هندێ ژى دزانين كو ئه‌و پرۆژه ل گه‌ل پێدڤيێن ڤێ ده‌ڤه‌رێ نه‌بوون، به‌لێ بێ گۆمان بن پرۆژێن ئه‌ڤرۆ و يێن حه‌فتيا بۆرى دێ ده‌سپێكا پرۆژێن زێده‌تر بن بۆ ده‌ڤه‌را هه‌وه”.
نێچيرڤان بارزانى گۆتژى: “حوكمه‌تا هه‌رێمێ پرۆژێن گه‌له‌ك باش بۆ ڤێ ده‌ڤه‌رێ هه‌نه د روويێ پێشخستنا چاندنێ و په‌ترۆلێ و گه‌شتيارى و سامانێن بن عه‌رد دا، ژبۆ پشكداريا هه‌وه يا كارا د ئاڤاكرنا بنياتنانا كوردستانه‌كا ب هێز دا”.
كۆژمێ پاره‌يى يێ بۆ ڤى پرۆژه‌يى هاتيه ته‌رخانكرن 80 مليۆن دۆلارن كو بڕياره د ماوێ دو سالان دا ئه‌و رێ ب دووماهى بهێت. ئه‌ڤ رێيه هاتنوچوون يا ناڤبه‌را دهۆك و هه‌ولێر دا بۆ نيڤ ده‌مژمێرێ كێم كه‌ت.
