ڤیان سه‌بری:پارتی یا به‌رهه‌ڤه بۆ دانوستاندنان ل گه‌ل ئالیێن ئیراقی
ئه‌ڤرۆ:
سه‌رۆكا فراكسیۆنا پارتی دیموكراتی كوردستان ل جڤاتا نوونه‌رێن ئیراقێ راگه‌هاند،ـ پارتی به‌رده‌وام یا به‌رهه‌ڤه بۆ دانوستاندنان ل گه‌ل ئالیێن ئیراقی و دیارك ركو پێشتر ژی به‌رده‌وام هه‌موو ئالی بۆ گه‌هشتن ب رێككه‌فتنێ سه‌ره‌دانا پارتی كریه.
ڤیان سه‌بری، سه‌رۆكا فراكسیۆنا پارتی دیموكراتی كوردستان ل جڤاتا نوونه‌رێن ئیراقێ گوت” پارتی به‌رده‌وام بوویه د دانوستاندنان ل گه‌ل ئالیێن ئیراقی و نوكه ژی پارتی دانوستاندنان ل گه‌ل هیچ ئالیه‌كی ره‌ت ناكه‌ت، د ده‌مێن بۆری ژی دا به‌رده‌وام ئالیێن ئیراقی بۆ دانوستاندنێ ل دۆر پرۆسا پێكئینانا حوكمه‌تا نوو یا ئیراقی سه‌ره‌دانا پارتی دیموكراتی كوردستان كریه”.
ڤیانێ ئاماژه‌كر” پارتی هێلا سوور ل سه‌ر هیچ ئالیه‌كێ ئیراقی نینه و ژ پێخه‌مه‌ت گه‌هشتنێ ب رێچاره‌كێ بۆ ره‌وشا نوكه یا ئیراقێ و لێكتێگه‌هشتنێ و رێككه‌فتنێ د ناڤبه‌را ئالیێن سیاسی دا، ل هیچ ده‌مه‌كی ده‌رگه‌هێ دانوستاندنێ دانه‌خستیه”.
ژ ئالیێ خوه‌ڤه مه‌حما خه‌لیل، ئه‌ندامێ جڤاتا نوونه‌رێن ئیراقێ ژ فراكسیۆنا پارتی گوت” نوكه دانوستاندن بۆ پێكئینانا حوكمه‌تا نوو یا ئیراقێ یێن هاتینه راگرتن و بریاره ئالیێن ئیراقی بۆ پێكئینانا حوكمه‌تا نوو و گه‌هشتن ب رێككه‌فتنێ ده‌ست ب دانوستاندنان بكه‌ن”.
مه‌حمای گوت ژی” بۆ پێكئینانا حوكمه‌تا زۆرینه هه‌موو بزاڤه‌ك دێ هێته دان، چونكه هه‌ڤپه‌یمانیا چارچۆڤێ هه‌ماهه‌نگیێ بێی پارتی و هه‌ڤپه‌یمانیا سیاده یا سوننی نه‌شێت حوكمه‌تێ پێكبینیت، به‌رۆڤاژی ژی پارتی و هه‌ڤپه‌یمانیا سیاده نه‌شێن بێی چارچۆڤێ هه‌ماهه‌نگیێ حوكمه‌تێ پێكبینن، بریاره ژی پارتی و سیاده ل دۆر ده‌ستپێكرنا دانوستاندنان كۆمببن”.
سه‌باره‌ت پێكئینانا لژنا دانوستاندنێن پارتی، وی په‌رله‌مانتارێ فراكسیۆنا پارتی دیاركر” پارتی پێشتر لژنا دانوستاندنان ل گه‌ل ئالیێن سیاسی هه‌بوو، ڤێجارێ ژی یان هه‌مان لژنه، یان لژنه‌كا نوو دێ هێته پێكئینان بۆ وێ چه‌ندێ ل گه‌ل ئالیێن سیاسی یێن ئیراقی ده‌ست ب دانوستاندنان بكه‌ت”.
