ڤیسته‌ڤالا پێكڤه‌ژیانێ یا هونه‌ری ل دهۆكێ هاته گێڕان
ئه‌ڤرۆ نیوز:
ل ئێڤاریا رۆژا 18\9\2018 ل هولا كونفرانسا و ب چاڤدێریا فه‌رهاد ئه‌مین ئه‌تروشی پارێزگه‌رێ دهوكێ و ب ئاماده‌بونا جێگرێ پارێزگاری و قایمقامێن قه‌زایێن پارێزگه‌هێ و كونسلێ وه‌لاتێ فره‌نسا و به‌رپرسێن رێكخراوێن مروڤایه‌تی رێ و ره‌سمێن ڤیسته‌ڤالا پێكڤه ژیانێ یا هونه‌ری هاتنه گێران.
ل به‌راهیێ پێشانگه‌ها شێوه‌كاری و كارێن ده‌ستی و وێنێن فوتوگرافی هاته ڤه‌كرن.
پاشی به‌رنامێن ڤیسه‌ڤالێ ده‌ستپێكرن و ل به‌راهیێ هاریكارێ پارێزگه‌رێ دهوكێ بو كاروبارێن مروڤایه‌تی په‌یڤا بخێر هاتنێ پێشكێشكر و ب خێر هاتنا هه‌موو به‌رهه‌ڤبویان كر وگوت پتر ژ 150 كه‌سان ژ ناڤ و ده‌رڤه‌ی كه‌مپا پشكداری د ڤیسته‌ڤالێ دا كریه كو ژ لایێ بوردێ كاروبارێن مروڤایه‌تی BRHA
و ب هه‌ڤكاری دگه‌ل رێكخراوا یونسێف و رێڤه‌به‌ریا گشتی یا ره‌وشه‌نبیری و هونه‌ری هاتیه سازكرن.
پاش پارێزگه‌رێ دهوكێ د په‌یڤه‌كێدا ده‌ست خوشی ل رێكخه‌رێن ڤیسته‌ڤالێ كر و ته‌كه‌ز كر كو چه‌ند ساله ئه‌ڤ جوره ڤیسته‌ڤاله دهێنه گێران و ده‌ربرینێ ژ هه‌بوون و به‌رده‌وامیا پێكڤه‌ژیانا ئوولی و نه‌ته‌وه‌یی لڤێ پارێزگه‌هێ دكه‌ت. هه‌روه‌سا گوت: هه‌ر لایه‌ن و كه‌سه‌ك لدوڤ به‌رپرسیاریا خو دڤێت هه‌وڵ بده‌ت كولتورێ ئاشتی و ته‌بایی و پێكڤه‌ژیان و لێبورینێ دناڤ جڤاكێ كوردستانێ دا به‌لاڤ كه‌ت و داخازا سه‌ركه‌فتنێ بو به‌رنامێن ڤیستیڤالێ كر……
پاشی چه‌ند چالاكیێن هونه‌ری و تابلویێن فلكلوری و هوزان و سروود هاتنه پێشكێشكرن و ده‌ربرین ژ كلتورێ هه‌موو پێكهاتێن پارێزگه‌هێ و كوردستانێ دكر….پاش سروودا پێكڤه‌ژیانێ هاته نمایشكرن و لدوماهیێ خه‌لات لسه‌ر تیپ و گروپێن پشكدار هاتنه به‌لاڤكرن.
