ڤێ حه‌فتیێ سزایێ گرێ نه‌دانا پیڤه‌رێ ئاڤێ دێ هێته دیاركرن
هه‌ولێر، قائید میرۆ:
بڕیاره ڤێ حه‌فتیێ لژنا هه‌ڤپشكا حوكمه‌ت و په‌رله‌مانێ كوردستانێ ل دۆر ئاریشا پیڤه‌رێن ئاڤێ كۆم ببیت و سه‌رۆكێ لژنا باژێڕڤانیان ژی ئاشكرا كر، پێداچوون د سزایێ گرێ نه‌دانا پیڤه‌رێن ئاڤێ دا دێ هێته‌كرن.
لوقمان وه‌ردی، سه‌رۆكێ لژنا باژێڕڤانیان ل په‌رله‌مانێ كوردستانێ بۆ رۆژناما ئه‌ڤرۆ دیار كر، پشتی وه‌زیرێ باژێڕڤانیان بۆ په‌رله‌مانی هاتیه گازیكرن و كۆمبوون ل دۆر چه‌ند ئاریشه‌یه‌كان هاتیه كرن و گۆت: “ئێك ژ وان ئاریشه‌یان سزایێن گرێ نه‌دانا پیڤه‌رێن ئاڤێ بوو، چونكو ل گوره‌ی بڕیارا وه‌زاره‌تێ هه‌ر وه‌لاتیه‌كێ پیڤه‌رێ ئاڤێ گرێ نه‌دابیت ئه‌ڤه دێ ب گوژمه‌كێ پاره‌ی هێته‌سزادان و وه‌لاتی ژی گازندان ل دۆر سزایێن ماددی دكه‌ن”.
لوقمان وه‌ردی گۆتژی: “لژنه‌یه‌كا هه‌ڤپشك بۆ چاره‌سه‌ركرنا ئاریشا پیڤه‌رێن ئاڤێ د ناڤبه‌را وه‌زاره‌تا باژێڕڤانی و په‌رله‌مانی دا هاتیه پێكئینان و بڕیاره د ئه‌ڤێ حه‌فتیێ دا لژنا هه‌ڤپشك كۆم ببیت و تێدا دێ میكانزمه‌كا نوو بۆ سزایێن پیڤه‌رێ ئاڤێ دیار كه‌ت، چونكو ئه‌م ژی وه‌ك لژنه دگه‌ل وه‌رگرتنا پاره‌یه‌كێ زۆر نینین وه‌ك سزایێ گرێ نه‌دانا پیڤه‌رێن ئاڤێ و دڤێت ره‌وشا ئابووری یا وه‌لاتیان ل به‌رچاڤ بهێته وه‌رگرتن، ئه‌ز باوه‌رم دێ بڕیاره‌كێ ده‌ین كو د به‌ڕژه‌وه‌ندیا وه‌لاتیان دا بیت”.
