ڤێ داستانا پێشمه‌رگه‌يى بخووینه، ئه‌و چیروكا د فلمان دا
ئه‌ڤرۆ نیوز، زنار توڤى:
شكاندنا گه‌مارویه‌كا داعشێ و رزگاركرنا ئه‌فسه‌ره‌كێ پێشمه‌رگه‌ى ژلایێ باب و برا و كه‌سوكارێن وى ڤه داستانه‌كا نوو یا پێشمه‌رگێن گه‌رمیانه، كو هیچ كێمتر نینه ژ چیروكا وان فلمێن سینه‌مایى یێن ل جیهانێ دهێنه نمایشكرن.
رزگاركرنا میلازم عه‌دنانى ژ لایێ باب و برایێن وى ڤه ئێكه ژ وان قاره‌مانیێن كو هێزا پێشمه‌رگێ كوردستانێ و هێزێن دى یێن ئه‌منى د شه‌رێ دوژمنێن كورد و ئاخا كوردستانێ دا هاتینه توماركرن، ب سه‌دان و هزاران قاره‌مانێن دى وه‌ك وان هه‌نه،كو ب سایا وان زوربه‌یا ئاخا كوردستانێ ژ ده‌ستێ دوژمنان ئینایه ده‌ر.
چیروك بڤى ره‌نگى یه، میلازم عه‌دنان دگه‌ل ژماره‌كا پێشمه‌رگه‌یێن دى ل ناڤچه‌یا گوێر به‌رگریێ ژ ئاخا كوردستانێ دكه‌ن، وێ شه‌ڤا چه‌كدارێن داعش ب نهێنى و برێیا ئاڤێ هێرشێ د ئیننه سه‌ر وان، یا ژ وان هاتى و هه‌ڤ شێوێ هه‌ڤالێن خو شه‌رێ وان چه‌كدارێن داعش دكه‌ن، لێ ده‌مژمێر(12) شه‌ڤێ میلازم عه‌دنان و ژماره‌كا دى یا پێشمه‌رگه‌یان ژلایێ چه‌ند چه‌كدارێن داعش دهێنه گه‌مارودان، ئه‌و ژى په‌یوه‌ندیێ ب خێزانا خوه دكه‌ت و حاله‌تێ خو بو وان دبێژیت و دبه‌رامبه‌ر دا باب و برایێن وى هه‌ر زوو خوه به‌رهه‌ڤ دكه‌ن و د هه‌وارا وان دچن.
ئیبراهیم محه‌مه‌د قادر كو برایێ میلازم عه‌دنانه،ده‌رباره‌ى وێ شه‌ڤێ و چاوانیا ل هه‌وارا چونا برایێ خوه دبێژیت:شه‌ڤا 9 ل سه‌ر 10\1\2015 ده‌مێ هێزێن پێشمه‌رگه‌ى ل ده‌ڤه‌را گوێر كه‌فتینه شه‌رێ داعشێ برایێ من ب ته‌له‌فونێ په‌یوه‌ندى ب مه كر كو ل ئێك گوندێن سه‌ر ب ناحیا گوێر و ل نێزیك زێیێ مه‌زن گه‌مارودایه و كه‌س ل تانا وان ناچیت،ئه‌و بوو پشتى نیڤ ده‌مژمێرێ ژ وێ په‌یوه‌ندیێ ل (12:30) شه‌ڤێ دگه‌ل باب و برا و خزم و كه‌سوكاران ژ كه‌لار ب دوو ترومبێلان به‌ره‌ف ناڤچه‌یا شه‌رى ل گوێر برێكه‌فتین.
د ڤه‌گێرانا ڤێ سه‌رهاتیێ دا ئیبراهیم به‌حس ل وێ كریه،كو ماوه‌یه‌كێ زور وان ڤیایه تا بگه‌هنه وێ ناڤچێ و دوماهى جار ل سپێدى گه‌هشتینه ناڤچه‌یا گه‌رم یا شه‌رى ل سنورێ گوێر،دڤى باریدا ب (كه‌ى ئێن ئێن) گوتیه: ده‌مێ برایێ من په‌یوه‌ندى كرى دگه‌ل چار ژ هه‌ڤالێن وى ب ته‌مامى گه‌مارو دابوون،ب مخابنى ڤه تا گه‌هشتینه وێرێ،د وى ده‌میدا برایێ من ته‌له‌فون بو مه كر و سێ هه‌ڤالێن وى شه‌هید ببوون و بتنێ برایێ من و هه‌ڤاله‌كێ خوه دژیانێ دا ما بوون،به‌لێ ئه‌و ژى ب سه‌ختى بریندار ببوون.
ئاماژێ ب وێ چه‌ندێ دكه‌ت كو ده‌مێ گه‌هشتینه گوێر،كو بابێ وى ژى رائیده و پێشمه‌رگه‌یێ خانه‌نشینه،نوكه ب ئه‌گه‌رێ شه‌رێ داعشێ دوباره ڤه‌گه‌ریایه بو خزمه‌تێ،دگه‌ل كه‌س و كارێن خوه بو وێ چه‌ندێ كو به‌ربه‌ستا داعشێ بشكێنن و هیرشێ بكه‌نه سه‌ر،داخوازا ترومبێله‌كا جورێ هه‌مه‌ر ژ فه‌رمانده‌یا پێشمه‌رگه‌ى كریه ل وێ ناڤچێ، وان ژى بو وان دابینكریه.
گوت ژى:د وى ده‌مى دا ئه‌م (12) كه‌س بووین مه هێرش كره سه‌ر جهێ گه‌مارودانا برایێ مه و مه گه‌مارویا داعشێ شكاند و عه‌دنان و ئه‌و پێشمه‌رگه‌یێ دگه‌ل دا مه رزگار كر و كو بریندار ببوو دگه‌ل. هه‌ر چه‌نده هه‌ڤده‌م دگه‌ل گه‌هشتنا كه‌سوكارێن میلازم عه‌دنانى ژ چه‌ند قولێن دیڤه پێشمه‌رگه‌ى به‌رسڤا چه‌كدارێن داعش دا و هێرش كره سه‌ر وان و شیان وان بشكێنن و ژماره‌كا زور ژ وان بكوژن،به‌لێ ئیبراهیم دبێژیت:ئه‌گه‌ر ژ كه‌لار ل تانا برایێ خوه نه‌چووباین مه رزگار نه‌كربا دوور نه‌بوو ئه‌ژى دگه‌ل هه‌ڤالێن خوه كه‌فتبا به‌ر ده‌ستێن داعش و هاتبا شه‌هید كرن، پشتى هاتیه رزگار كرن، ئه‌و ئه‌فسه‌رێ پێشمه‌رگه‌ى هاته ڤه‌گوهاستن بو نه‌خوشخانا هه‌ولێرێ و چاره‌سه‌ریا پێدڤى بو هاتیه كرن.
ب گوتنا فه‌رمانده‌یێ پێشمه‌رگه‌یان ئه‌و هێزا داعشێ هێرش كریه سه‌ر گوێر پترى(100) كه‌سا بوون،ژبلى وێ چه‌ندێ ئه‌و هێزه‌كا مه‌شق پێكرى بوون،شێوازێ جل و به‌رگ و چه‌كى و هێرش كرنا وان یا جیاواز بوو ژ چه‌كدارێن دى یێن داعش،پتریا وان بیانى بوون،ئه‌و هێرشا ڤێ سپێدێ داعشێ كرى دڤیان ته‌رمێن كوشتى یێن خوه ببه‌ن،لێ وێ هێزێ ژى شكه‌ستن ئینا و كه‌س ژێ قورتال نه‌بوو.
