زانكۆيا دهۆك 40% ژ رێڤەبەری و پشکێن کارگێری کێمکرن
ئه‌ڤرۆ نيوز:
ل دووڤ بڕیارا جڤاتا وەزیران و وەزارەتا خواندنا بلند ل حوکمەتا ھەرێما کوردستانێ ل دۆر کێمکرنا ھژمارا رێڤەبەری و پشکێن کارگێری ل زانکۆیێ و کێمکرنا مەزاختیان، وەکو چارەیەک بۆ قەیرانا دارایی، زانکۆیا دھۆک 40% ژ رێڤەبەری و پشکێن کارگێری کێمکرن.
د. جەمال عەلی حەسەن، ھاریکارێ سەرۆکێ زانکۆیا دھۆک بۆ کاروبارێن کارگێری و دارایی دیار کر کو زانکۆیا دھۆک لژنەکا تایبەت کو ب سەرۆکاتیا وی ژ بۆ پێداچوونێ ل سەر پەیکەرێ کارگێری یێ زانکۆیا دھۆک پێکئینا و بۆ رۆژناما ئەڤرۆ گۆت: “پشتی کۆمبوون ھاتینەکرن دوھی 28/3/2016 لژنا پێداچوونێ ئەو پەیکەرێ نوو ھاتیە دیارکرن پەسەند کر و بۆ وەزارەتا خواندنا بلند و ڤەکۆلینێن زانستی ھنارت، دا کو ژلایێ ھەردو وەزارەتێن خواندا بلند و ڤەکۆلینێن زانستی و دارایی ڤە بھێتە پەسەندکرن”.
دکتۆری خویا ژی کر، د وێ گوھۆرینێ دا نێزیکی 14 رێڤەبەری ھاتینە لێکدان و ھەلوەشاندن کو دبیتە نێزیکی 40% ژ کێمکرنا ھژمارا رێڤەبەریان ل سەرۆکاتیا زانکۆیا دھۆک و گۆت: “25 پشکێن کارگێری یێن ب سەر رێڤەبەریێن سەرۆکاتیا زاتکۆیا دھۆک کو دبنە نێزیکی 30% ژ ھژمارا پشکێن کارگێری ھاتنە کێمکرن.
سەرۆکێ لژنا پێداچوونێ ل پەیکەرێ کارگێری یێ زانکۆیا دھۆک ئاماژە ب وێ چەندێ ژی کر، ل ھەر کۆلیژەکا زانکۆیا دھۆک پێنج پشکێن کارگێری ھاتنە ھەلوەشاندن و ئەو پشکێن مایی ژی دێ بنە (ھۆبە).
د. جەمال عەلی حەسەن ئەو چەندە ژی ئاشکرا کر کو ب ڤێ رێکێ دێ شێن مەزاختیێن زانکۆیێ کێم کەن و ئەڤە قووناغا ئێکێ یە یا چاکسازیان و گۆت: “پشتی ئەڤ پەیکەرە دھێتە پەسەندکرن، لژنا پێداچوونێ دێ دوبارە پێداچوونێ ل سەر پەیکەری کەت بۆ ھندێ پتر رێڤەبەری، پشک و ھۆبێن کارگێری ل زانکۆیێ بھێنە کێمکرن”.
