ڤەكرنا پاركا پێشمەرگە ل وەلاتەكێ داڕێژەرێ سیاسەتا دەرڤەیا ئێكەتییا ئۆرۆپا گرنگییا خوە هەیە
نوونەرێ حوكمەتا هەرێما كوردستانێ ل ئێكەتییا ئۆرۆپی راگەهاند: ڤەكرنا پاركەكێ ب ناڤێ پێشمەرگەی ل وەلاتەكێ ئۆرۆپی یێ خودان ڤیتۆ ل جڤاتا ئاسایشا نێڤدەولەتی و داڕێژەرێ سیاسەتا دەرڤەیا ئێكەتییا ئۆرۆپا گرنگییا خوە هەیە.
دلاوەر ئاژگەیی، نوونەرێ حوكمەتا هەرێما كوردستانێ ل ئێكەتییا ئۆرۆپا گوت» سەرەدانا سەرۆك بارزانی بۆ فرەنسا و ڤەكرنا پارك و رێیا پێشمەرگە ل پاریسێ، و ئەنجامدانا چەندین كۆمبوونان ل گەل بەرپرسێن فرەنسی هەڤبەندیێن هەرێما كوردستانێ ل گەل فرەنسا و وەلاتێن دی پێشڤە دبەت».
گوت ژی» د وان كۆمبووناندا، هەڤبەندیێن دوقۆلی و هەڤبەندیێن هەرێما كوردستانێ ل گەل ئیراقێ، رۆلێ هەرێما كوردستانێ د ئارامییا دەڤەرێدا هاتبوونە باسكرن».
نوونەرێ حوكمەتا هەرێما كوردستانێ ل ئێكەتییا ئۆرۆپا ئاماژە ب وێ چەندێ ژی كر» ڤەكرنا پارك و رێیا پێشمەرگەی ل وەلاتەكێ وەكو فرەنسا، گرنگییا خوە هەیە، چونكە فرەنسا ئێك ژ وەلاتێن ب هێز یێن ئێكەتییا ئۆرۆپایە و خودان ڤیتۆیە ل جڤاتا ئاسایشا نێڤدەولەتی و داڕێژەرا سیاسەتا دەرڤەیا ئێكەتییا ئۆرۆپایە، هەڤدەم فرەنسا و هەرێما كوردستانێ هەڤبەندییەكا دیرۆكی هەیە و هەردەم ل دەمێن دژوار پشتەڤانییا هەرێما كوردستانێ كریە و ل سەر ئاستێ نێڤدەولەتی ژی پشتەڤانا وێ بوو».
ل دۆر رۆلێ سەرۆك بارزانی، ئاژگەیی گوت» ل دەف سەرۆك بارزانی پرسا كوردی ژ سیاسەتێ گرنگترە، لەوما هەردەم د دەمێ پێدڤیدا ب سیاسەتا خوە پشتەڤانییا پارچەیێن دی یێن كوردستانێ كریە، ڤێ چەندێ ژی وەكریە هەر چار پارچەیێن كوردستانێ ب سەرۆكێ خوە بزانن».
هەروەسا دیاركر» ڤەخواندنا سەرۆك بارزانی بۆ فرەنسا، وەك سیمبۆلەك و رێزگرتن ل پێشمەرگەی بوو، چونكە ڤەكرنا پاركەكێ ب ناڤەكێ كوردی بڕیارەكا ب ساناهی نینە، هەروەسا پترییا وەلاتێن ئۆرۆپا هەمان رێز و بۆچوون بۆ پێشمەرگەی هەیە، ڤێ چەندێ ژی كارەكێ مەزن بۆ هاتیە كرن».
نوونەرێ حوكمەتا هەرێما كوردستانێ ل ئێكەتییا ئۆرۆپا ئەوژی برەچاڤكر» رێككەفتنا د ناڤبەرا ئەمریكا و ئیراقێدا بۆ ڤەكێشانا هێزێن ئەمریكی ژ ئیراقێ، وەلاتێن ئۆرۆپی ڤەناگریت و ئەو دێ بەردەوام بن د پشتەڤانییا پێشمەرگەی دا».
پتر گوت» ل مەها داهاتی كۆمبوونەك د ناڤبەرا ئێكەتییا ئۆرۆپا و ئیراقێ دا دێ هێتە كرن و ئەم ژی دێ د وێ كۆمبوونێدا پشكدار بین و تێدا دێ باس ل هەڤبەندیێن د ناڤبەرا هەولێرێ و بەغدایێ دا هێتە كرن، چونكە هەڤبەندیێن وان بۆ ئێكەتییا ئۆرۆپا گەلەك گرنگە، هەكە هەڤبەندیێن هەولێرێ و بەغدایێ تێكبچن، دێ كاریگەری ل سەر هەڤبەندیێن ئیراقێ و ئێكەتییا ئۆرۆپا هەبیت».
خویاكر ژی» ئێكەتییا ئۆرۆپا دخوازیت هەولێر و بەغدا رێكبكەڤن، ب شێوەیەكی د بەرژەوەندییا هەردو ئالییاندا بیت».
