کابینا نوو دێ پرۆژێ چاکسازیێ بجه ئینیت
ئەڤرۆ نیوز:
بریارە کارێ سەرەکی یێ کابینا نوو یا حوکمەتا هەرێما کوردستانێ بجهئینانا پرۆژێ چاکسازیێ بیت و ب تایبەتی ژی ئەو کەرتێن کو گەندەلی تێدا هەنە و مووچێن بندیوار دێ هێنە بڕین و پرۆژە دێ ل پەرلەمانی هێتە پەسەندکرن.
ل گۆر رێککەفتنا پارتی ل گەل ئالیێن دی یێن پشکدار د کابینا نوو یا حوکمەتێ دا پشتی راگەهاندنا کابینا نوو حوکمەتا هەرێما کوردستانێ ب سەرۆکاتیا مەسرور بارزانی وەکو کارێ ئێکێ دێ بجهئینانا پرۆژێ چاکسازیێ بیت، ب تایبەتی ژی د کەرتێ پەترۆلێ، وەربەرهێنانێ و مووچێن بندیوار.
پرۆژێ چاکسازیێ بەری نها ل پەرلەمانێ کوردستانێ هاتیە ئامادەکرن و ل گۆر رێککەفتنا پارتی و ئالیێن دی یێن پشکدار د کابینا نوو دا دڤێت هەر زوو پرۆژێ چاکسازیێ بهێتە بجهئینان کو ئەو یەک دێ بیتە ئەگەرێ هندێ رەوشا ئابووری یا هەرێما کوردستانێ ژی باشتر لێ هێت.
کوێستان محەمەد ئەنداما جڤاتا نشتیمانی یا بزاڤا گۆرانێ ژی دیار کریە کو ئێک ژ خالێن سەرەکی یێ رێککەفتنا پارتی و گۆرانێ بجهئینانا پرۆژێ چاکسازیێ یە.
