کاروانەکێ چەکێ گرانێ پێشمەرگەی ل بەغدایێ دھێتە دزین
ئەڤرۆ نیوز:
جێگرێ سەرۆکێ لێژنا ئاسایش و بەرەڤانیێ ل ئەنجومەنێ نوونەرێن عیراقێ ئاشکرا کر، کو بەلگە ل بەر دەستێ وانن کو ئەو چەکێ گران و پێشکەفتی یێ بۆ ھێزێن پێشمەرگەی ھاتی ل بەغدا ھاتیە دزین و گۆت “مە ژی ئەمریکا و فڕەنسا ھایدار کرینە”.
شاخەوان عەبدولا، جێگرێ سەرۆکێ لێژنا ئاسایش و بەرەڤانیێ ل ئەنجومەنێ نوونەرێن عیراقێ بۆ (باسنیوز) دیار کریە کو کاروانەکێ چەک و تەقەمەنیێن پێشکەفتی بۆ ھێزێن پێشمەرگێ کوردستانێ ھاتیە، لێ بەغدایێ ڤەشارتیە و نەگەھاندینە ھەرێمێ، ب ئاوایەکی ھەکە 30 ھەمەرێن لەشکری ھاتبن پێدڤیە ب رێژا 17% بدەنە پێشمەرگەی، لێ ھیچ ھەمەرەک نەدایە پێشمەرگەی و گۆت “20 تەنێن چەک و تەقەمەنیان بۆ عیراق ھاتینە کو بڕیار وەسا بوو بەھرا ھەرێما کوردستانێ ژی تێدا بیت، لێ ھیچ تشتەک نەگەھشتیە ھەرێمێ”.
شاخەوان عەبدولا کو ژ لیستا پارتی دیمۆکراتی کوردستانە خویا ژی کر کو وان ل سەر دیار نەمانا پشکا ھەرێمێ ژ وی چەکی رۆژا 23\11\2015، کۆنسوڵگەریا ئەمریکا ھایدار کریە و گۆت “ئەز ب خوە دو دەمژمێران ل گەل کۆم بوویمە، ھەروەسا ل گەل باڵیۆزێ فڕەنسا ژی کۆم بوویمە و من ئەو ژی ل سەر ڤێ پرسێ ھایدار کرن”.
شاخەوان عەبدولا د وێ باوەریێ دایە کو بەغدا دزانیت پێشمەرگە دێ بیتە ھێزا دەوڵەتا کوردی، لەورا نەڤێت ب رێیا وێ ھاریکاریا پێشمەرگەی بھێتەکرن.