رۆژا ئەیینی دێ رێورەسمێن جەژنا رۆژیێن ئێزی ھێنە گێڕان
ئەڤرۆ نيوز:
سەرۆکێ دەستەیا بلندا بنگەھێ لالش دیار کر کو ب ھەلکەفتا ھاتنا رۆژیێن ئێزی بنگەھێ لالش ب ھەماھەنگی دگەل کارگێریا کەمپا مام رەشان دەست ب بەلاڤکرنا ھارێکاریێن دارایی ل سەر خێزانێن ئاوارێن شنگالێ یێن ھەژار ل کەمپا ناڤھاتی کر.
شێخ شامۆ، سەرۆکێ دەستەیا بلندا بنگەھێ لالش یێ رەوشەنبیری و جڤاکی دیار کر کو ل ھەموو کەمپێن ئاوارێن شنگالێ ل دووڤ بەرنامەکێ رێکخستی دەست ب بەلاڤکرنا ھارێکاریێن دارایی ل سەر خێزانیێن ئاوارێن شنگالێ ھاتیە کرن و ئەڤ جۆرە ھاریکاریە دێ ھەتا پشتی جەژنا رۆژیێن ئێزی د بەردەوام بن و نێزیکی 500 خێزانێن ھەژار و دەست کورت ل 12 کەمپێن ئاوارێن شنگالێ تێدا د ئاکنجیی ل سنوورێ پارێزگەھا دھۆکێ دێ ژێ د مفاداربن و گۆت: “دەمێ ناڤێن خێزانێن ھەژار و دەست کورت دگەھنە مە ئەم ب رێیا بنگەە و نڤیسینگەە و تایێن بنگەھێ لالش ب ھەماھەنگی دگەل ئێدارێن کەمپان دەست ب بەلاڤکرنا ھاریکاریان ل سەر وان خێزانان دکەین و ئەڤە پتری سێ سالانە ئەم بەردەوام ل دووڤ داخوازیێن ئاوارێن شنگالێ دچین و یا د شیاندا بیت بۆ خەلکێ لێقەومیێن شنگالێ دکەین”.
نڤیسینگەھا بابە شێخ مەرجعێ بلند یێ ئیزدیان راگەھاندنەک بەلاڤکریە کو ئەڤرۆ رۆژا 12/12/2017 ئێزدی دێ رۆژیا ئێکی یا رۆژێن ئیزی گرن و بۆ دەمێ سێ رۆژان دێ ئێزدی ب رۆژی بن ھەتا رۆژا 14/12/2017 و رۆژا چارێ ئانکو رۆژا ئەیینی 15/12/2017 دێ بیتە جەژنا رۆژیێن ئێزدیان ئانکو ئێزدی دێ ل رۆژێن سێشەمب و چارشەمب و پێنجشەمبێ ب رۆژی بن.
ژ ئالیێ خوە ڤە جەھوەر عەلی عەزیز قایمقامی قەزا دھۆکێ بۆ رۆژناما ئەڤرۆ دیار کر کو بۆ ھەر سێ رۆژیێن ئێزدیان دێ رەوشا ئێزدیان بەرچاڤ ھێتە وەرگرتن ھەکە کارەبا نشتیمانی نەبیت دێ یا موەلیدان ل دەمی پاشیڤێ بۆ وان ھێتە دابینکرن.
ھەژی گۆتنێ یە کو ئێزدیان ھەشت جەژن ھەنە ژ وان ژی سێ جەژن ل پەرستگەھا لالش دھێنە گێران ئەو ژی جەژنا چلێ ھاڤینێ و جەژنا چلێ زڤستانێ و جەژنا جەمایێ، ھەروەسا پێنج جەژن د ناڤ جڤاکی دا دھێنە گێران ئەو ژی جەژنا سەرێ سالێ و رۆژیێن ئێزی و بێلندێ و خدر ئلیاس و جەژنا قوربانی.
