کارەب دێ بیتە 24 دەمژمێر
ئەڤرۆ نیوز:
پەیڤدارێ ئێکەتیا وەبەرئینەرێن کوردستانێ ئاشکرا کر کو پڕۆژەکێ پێشکەفتی بۆ چارەسەرکرنا ئاریشا کارەبا نیشتیمانی یێ ھاتیە بەرھەڤکرن و ددەمێ بجھئینانێ دا کارەبا نیشتیمانی دێ بیتە 24 دەمژمێر و گۆت: “دەمێ ئەڤ پرۆژە دکەڤیتە کاری بھایێ کریا کارەبێ ل سەر وەلاتیان زێدە نابیت و دێ ھەر وەکو خوە مینیت”.
یاسین مەحموود، پەیڤدارێ ئێکەتیا وەبەرئینەرێن کوردستانێ بۆ رۆژناما ئەڤرۆ دیار کر کو پڕۆژەکێ پێشکەفتی بۆ سیستەمێ کارەبا ھەرێما کوردستانێ یێ ھاتیە بەرھەڤکرن و بڕیارە ئەو پڕۆژە ئاراستەی (مەسعود بارزانی) سەرۆکێ ھەرێما کوردستانێ بھێتەکرن و گۆت: “ل گۆرەی ڤی پرۆژەی ئاریشا کارەبێ ل ھەرێما کوردستانێ دێ ھێتە چارەسەرکرن و 24 دەمژمێران کارەب بۆ وەلاتیان دێ ھێتە دابینکرن بیێ کو پارێ وێ ل سەر وەلاتیان بھێتە زێدەکرن ژ بەر ڤێ چەندێ ھەکە ئەڤ پرۆژە بھێتە بجھئینان ئەم ب ھیڤینە کو چو ئاریشێن کارەبا نیشتیمانی ل ھەرێمێ نامینن”.
ناڤھاتی ئاماژە دا وێ چەندێ کو ئەڤ پرۆژە یێ ژ لایێ کەرتێ تایبەت ڤە ھاتیە بەرھەڤکرن و ھەتا ڤی پرۆژەی ئاراستەیی سەرۆکێ ھەرێما کوردستانێ نەکەن ناڤەڕۆکا وی ناھێتە ئاشکرا کرن، چونکی رەنگە زیان ب گەھیتە پڕۆژەی و د راگەھاندنێ دا خواندنێن شاش بۆ بھێنەکرن و گۆت: “ئەم دخوازین بۆ چارەرسەرکرنا پرسا کارەبێ دگەل حوکمەتێ دھاریکاربین داکو بارگرانینی نەکەڤیتە سەر ملێن وەلاتیان و بھایێ کارەبا نیشتیمانی ھەر وەکو خوە بمینیت”.
