کار ل سەر تمامکرنا پرۆژێ ئوڤەڕپاسا باعەدرێ دھێتە کرن
ئەڤرۆ نیوز، بارزان مزووری:
قایمقامێ قەزا شێخان بۆ ئەڤرۆ نیوز دیار کر، ب مەرەما کێمکرنا روودانێن ھاتنوچوونێ و ب ساناھیکرنا رێیێ؛ نوکە کار ل سەر تمامکرنا ئوڤەڕپاسا باعەدرێ دھێتە کرن.
سەردار یەحیا عەبدولعەزیز، قایمقامێ قەزا شێخان خویا کر، پرۆژێ ستراتیژی یێ دروستکرنا ئوڤەرپاسا باعەدرێ و کەلەکچی و دروستکرنا سایدێ دویێ یێ رێیا سەرەکی د ناڤ کۆمەلگەھا چرەی بۆ ناڤ سەنتەرێ ناحیا رۆڤیا ژ پرۆژێن گرنگێن حوکمەتا ھەرێما کوردستانێ یێن سالا ٢٠١٣ بوون، بەلێ ژ بەر قەیرانا دارایی پرۆژێ ئوڤەڕپاسا کەلەکچی و باعەدرێ ھاتبوو راوەستاندن.
ناڤھاتی ئاشکرا کر، پشتی رەوشا دارایی بەرەڤ باشبوونێ چووی و ب مەرما کێمکرنا روودانێن ھاتنوچوونێ و ب ساناھیکرنا رێیێ وان گڤاشتن ئێخستە سەر ھەردو کۆمپانیێن بجھئینەر کو پرۆژێ ئوڤەرپاسا کەلەکچی و باعەدرێ تمام بکەن و گۆت: “وان کۆمپانیان ئاریشەک د ناڤبەرا خوە دا ھەبوو، پشتی ئاریشا ژ لایێ دادگەھێ ڤە ھاتیە ئێکلاکرن ئێک ژ وان کۆمپانیا دەست ب تمامکرنا پرۆژەی کر، ل دەستپێکێ پرۆژێ ئوڤەڕپاسا کەلەکچی تمامکر و د نھا دا پرۆژێ ئوڤەڕپاسا باعەدرێ دێ تمام کەت”.
