کامیرێن چاڤدێریێ ل قوتابخانان ھاتنە دانان
ئەڤرۆ:
پروسەیا پەروەردە و فێرکرنێ ب تایبەتی دڤی سەردەمی دا د قووناغەکا ھەستیار و نازک دا دبۆریت و دەھان ئاریشە د ژینگەھا قوتابخانان دا ھەنە، و پێدڤی یە چاکسازی تێدا بھێتەکرن، و ئێک ژ گرنگترین وان رێیێن کو چاکسازی دناڤەندێن خواندنێ دا بھێنەکرن و ل سەر ئاریشەیێن مامۆستا و قوتابیان دا زال ببیت دانانا کامیرایێن چاڤدێریێ یە.
قوتابی بێوار محەمەد دیارکر کامیرێن چاڤدێریێ پێدڤی یەکا سەردەمە و گۆت: ( گەلەک جاران ئاریشە دناڤبەرا قوتابی و قوتابی ، و قوتابی و مامۆستایان درۆست دبن و دەما کو چارەسەری بوو دھێتەکرن، کەس نزانیت کیش ھەقە و کیش نەھەق ژ بەرکو کەسێ ژوان چوو بەلگە نینن ، بەلێ ئەگەر کامیرایێن چاڤدێریێ بھێنەدانان ھەقی و نەھەقی دێ دیاربیت و نەھەق دێ گەھێتە سزایێ خوە و ھەق ژی دێ گەھیتە یاخوە ).
مامۆستا محەمەد سالح پێندوری جگەر سووز دیارکر کو رۆژانە ئاریشەیێن توندوتیژیێ دناڤەندێن خواندنێ دا چوو کێم بیت یان زۆر درۆست دبن و گۆت: (ئێک ژ وان ئاریشەیێن کو ھەردەم دبیتە ئاستەنگ د رێیا پێشڤەچوونا پروسەیا پەروەردە و فێرکرنێ ھەبوونا توندوتیژیێ یە ل قوتابخانەیان و ئەڤ یەک ژی کارتێکرنەکا نەرێنی لسەر تاکێن جڤاکی درۆستدکەت ب تایبەتی ژلایێ زانستی و ھزری و پەروەردەیی و ئابووری و جڤاکی ڤە و بێگومان ژی توندوتیژی د ژینگەھا قوتابخانێ دا چەند جورەکن و ژوان توندوتیژی مامۆستا بەرامبەر قوتابی و بەروڤاژی، قوتابی بەرامبەر قوتابی، دیسان دەستدرێژیا قوتابیان بوو سەر کەلوپەلێن ماموستایان و قوتابخانێ ، و دەستدرێژیا ھندەک کەس و کارێن قوتابیان بەرامبەر ھندەک قوتابیێن دن د قوتابخانێ دا و دەستدرێژیا ھندەک کەس و کارێن قوتابیان بەرامبەر ماموستایان ل قوتابخانەیان ).
زێدەتر گۆت: (داکو ئاریشەیێن ژینگەھا قوتابخانەیان نەھێلین یان کێم بکەین پێدڤی یە کامیرایێن چاڤدێریێ ل قوتابخانەیان بھێنەدانان و ب ھزرا من ئەگەر کامیرایێن چاڤدێریێ بھێنەدانان دێ بیتە سەدەما نەھێلان و کێمکرنا توندوتیژیان و ماموستایان نەچاردکەت کو قوتان و توندوتیژیێ بەرامبەر قوتابیان ب کارنەئینیت).
خورشید یحیا ھاریکارێ رێڤەبەریا گشتی یا پەروەردا پارێزگەھا دھوکێ دیارکر کو ل ھندەک قوتابخانەیێن سەنتەرێ پارێزگەھا دھوکێ کامیرا ھاتینەدانان و بۆ ئەڤرۆ گۆت: (ھەر پەروەردەکا قەزایێ و ھەر قوتابخانەکا شیان ھەبن دکاریت کامیرایێن چاڤدێریێ بدانیت و چوو رێگری لێناھێنەکرن ).
گوت: (نھا ل سەنتەرێ پارێزگەھا دھوکێ ب تایبەتی پەروەردا رۆژھەلات نێزیکێ شەش قوتابخانەیەکا کامیرایێن چاڤدێریێ داناینە و دخوازین کو ل ھەموو قوتابخانەیان بھێنەدانان ، و بێگومان ھەر قوتابخانەیەکا کامیرایێن چاڤدێریێ بدانیت ئاریشەیێن وان کێمترن ژ وان قوتابخانەیێن کامیرایێن چاڤدێریێ نەداناین ).
مامۆستا محەمەد سالح پێندوری د ل دوواماھیا ئاخفتنێن خودا گۆت: (پێدڤی یە ئەڤ کامیرایێن چاڤدێریێ ژلایێ لیژنەیەکا تایبەت ڤە بھێنە کونترولکرن و ھەموو کەس نەکارن بەرێخودانێ بوو بکەن یان دەستڤە بدەن و د ھەمان دەم دا بتنێ ل دەما پێدڤی بوونێ ئەڤ کامیرایە بھێنەڤەکرن).
