کـوردێن سووریێ ژ هـەلوەستێ رۆسیا دلگرانن
ب، سه‌رجان مەحمود:
کوردێن رۆژئاڤایێ کوردستانێ دیار دکەن هەلوەستێ ڤێ دووماهیێ یێ رۆسیا خزمەتا چارەسەریا قەیرانا سووریێ ناکەت و وەکو کوردێن سووریێ وان دڤێت ل گەل شامێ پرسێن هەی چارەسەر بکەن، لێ نیەتا شامێ یا باش نینە و ئەو ژی دەست ژ مافێن خوە یێن رەوا بەرنادەن.
وەزیرێ دەرڤە یێ رۆسیا بەری چەند رۆژان دیار کربوو، دڤێت کوردێن سووریێ پشتا خوە ب ئەمریکا گەرم نەکەن، چونکی ئەمریکا دێ وەکو ئەفغانستانێ کوردێن سووریێ ژی ب تنێ هێلیت و وی دەمی دێ ئاریشێن هەی مەزنتر لێ هێن و دڤێت کوردێن سووریێ خوە ژ ئەمریکا دوور بکەن.
د ڤێ دەربارێ دا ئیلهام ئەحمەد ئێک ژ بەرپرسێن رێڤەبەریا خوەسەر ژی دیار کر، هەلوەستێ ڤێ دووماهیێ یێ رۆسیا ل هەمبەر کوردان گەلەک خرابە، وەکو کوردێن سووریێ وان د شەرێ ل دژی داعشێ دا گەلەک قوربانی داینە و شیاینە ئاخا خوە بپارێزن، وان نها ژی نەڤێت ئاخا سووریێ پارچە بکەن، بەلکو وەکو کورد وان دڤێت ل سەر ئاخا خوە و د چارچۆڤێ سووریایەک دیموکراتیک دا ل گەل هەموو نەتەوەیێن دی بژین، لێ هەتا نها ژی هەلوەستێ شامێ ل هەمبەر کوردان نەهاتیە گوهۆڕین و مخابن هەلوەستێ نها یێ رۆسیا ژی گەلەک خرابە و د خزمەتا چارەسەریا قەیرانا سووریێ دا نینە.
هەمان بەرپرسێ ئەو یەک ژی دیار کر، دڤێت رۆسیا شامێ نەچار بکەت دا راستیا هەی قەبوول بکەت و دانپێدانێ ب رێڤەبەریا خوەسەر بکەت و مافێن رەوا یێن کوردان ژی قەبوول بکەت، وی دەمی کوردێن سووریێ ژی دشێن د چارچۆڤێ سووریایەک نوو دا ل گەل شامێ هەموو پرسێن هەی ب دانوستاندنان چارەسەر بکەن.
هەر د ڤێ دەربارێ دا زەکەریا عەفرینێ چاڤدێرێ سیاسی ژی دیار کر، داخۆیانیا ڤێ دووماهیێ یا وەزیرێ دەرڤە یێ رۆسیا دێ بیتە ئەگەر پرسێن هەی پتر ئالۆز ببن، چونکی بەری نها گەلەک جاران لاڤرۆڤی ب خوە دیار کریە ئەو پشتەڤانیێ ل مافێن رەوا یێن گەلێ کورد ل سووریێ دکەن و هەتا پرسا کوردان ل سووریێ نەهێتە چارەسەر کرن قەیرانا نها ل سووریێ ژی دێ بەردەوام بیت، وی دەمی دڤێت رۆسیا ببیتە پشتەڤان بۆ ڤێ یەکێ دا رێڤەبەریا خوەسەر و شام دەست ب قۆناغەکا نوو بکەن، چونکی هەر کەس دزانیت هەتا کورد ل سووریێ نەگەهنە مافێن خوە یێن رەوا قەیرانا هەی دێ ب دژواری بەردەوام بیت و ئەو یەک د خزمەتا چو ئالیەکێ دا نینە.
چاڤدێرێن سیاسی ژی دیار دکەن، ئەمریکا و رۆسیا سەبارەت ب پاشەرۆژا سووریێ گەلەک ناکۆکیێن خوە هەنە، مخابن نها بابەتێ مافێن کوردان ل سووریێ ژی بوویە پشکەک ژ ناکۆکیێن ئەمریکا و رۆسیا و دڤێت کورد ل سووریێ هشیار بن و نەبنە قوربانیێن ناکۆکیێن نها یێن د ناڤبەرا ئەمریکا و رۆسیا دا.
