کوردان دڤێت ب رێیا پەرلەمانی کاریگەریا خوە ل سەر سیاسەتا ئیرانێ بکەن
ئەڤرۆ نیوز:
ھەلبژارتنێن پەرلەمانێ ئیرانێ نێزیک دبن و دوھی دەرگەھێ خوە بەربژارکرنێ بۆ کەسێن کو بخوازن بچنە پەرلەمانی ھاتە ڤەکرن و ل باژێرێن رۆژھەلاتێ کوردستانێ رێژەکا بەرچاڤ ژ مامۆستا و کەسایەتیێن سیاسی خوە بۆ پەرلەمانێ ئیرانێ بەربژار کرینە و مامۆستایەکێ زانکۆیێ ژی دیار دکەت کو کوردان دڤێت کاریگەریا خوە ل پەرلەمانێ ئیرانێ بکەن لێ سیستەمێ نھا ناھێلیت کورد ل ژێر ناسناما نەتەوی بچنە پەرلەمانی.
تاھر جەمشیدی مامۆستایێ زانکۆیا خوێ یا رۆژھەلاتێ کوردستانێ بۆ رۆژناما ئەڤرۆ راگەھاند کو کاریگەریا گوھۆرینێن ل پارچێن دی یێن کوردستانێ ل سەر رۆژھەلاتێ کوردستانێ رۆژ ب رۆژێ زێدەتر دبیت و ئەو یەک د چەند رۆژێن بۆری دا ژی ب رەنگەکێ ئاشکرا دیار بوو دەمێ کو گەلەک کەسان بەرھەڤیا خوە نیشا داینە کو خوە بەربژێر بکەن و بچنە پەرلەمانێ ئیرانێ و گۆت: (بەرەیێ یەکگرتی یێ کوردی کو وەک ھێزەکا سیاسی و قانوونی یا کوردان ل رۆژھەلاتێ کوردستانێ دھێتە نیاسین دخوازن کورد جوداتر ژ جاران بچنە پەرلەمانی، چونکو پشتی شۆرەشا ئیسلامی یا ئیرانێ ھەتا نھا ھەکە ھندەک کورد چووبنە پەرلەمانی ژی ئەو یەک ب پشتەڤانیا بەرپرسێن ئیرانێ بوویە و ئەو کەس وەک نوونەرێن کوردان نەچووینە پەرلەمانی دا کو داخوازا مافێ رەوا یێ خەلکێ کوردستانێ بکەن).
ناڤھاتی د پشکەکا دی یا ئاخڤتنا خوە دا ئەو یەک ژی دیار کر کو ڤێجارێ بەرەیێ یەکگرتی یێ کوردی دڤێت وەک پارتەکا سیاسی ھندەک ئەندامێن کورد دەستنیشان بکەت و پشتەڤانیێ ل وان بکەت دا کو ئەو بچنە پەرلەمانی، لێ ل گۆر نێرینا من ئەو یەک کارەکی بساناھی نابیت و دێ ئاستەنگیێن گەلەک مەزن بۆ وان دروست بن، چونکو بەری ھەر تشتەکێ ل ئیرانێ میکانیزما لیژنا زێرەڤانیێ ھەیە کو ئەو دشێن بەربژێریا گەلەک کەسان رەت بکەن و د سالێن بۆری دا ژی مە دیت کا چاوا نەھێلان گەلەک کەسایەتیێن ناڤدارێن کورد بچنە پەرلەمانێ ئیرانێ و گۆت: (ژ بەر ھندێ ئەز باوەرم ناکەم ھەلبژارتنێن ڤێجارێ ژی چو کاریگەریا خوە ل چارەکرنا پرسا کوردی ل ئیرانێ بکەت، چونکو د چارچۆڤێ سیستەمێ نھا دا ل ئیرانێ کورد نەشێن بگەھنە مافێن خوە و گەلەک ئاستەنگی ل ھەمبەر خەباتا سیاسی و مەدەنی یا خەلکێ رۆژھەلاتێ کوردستانێ ھەیە).
مامۆستایێ زانکۆیێ د پشکەکا دی یا ئاخڤتنا خوە دا ئەو یەک ژی دیار کر کو ھەکە رێگری ل بەربژێرێن کوردان نەھێتە کرن ئەز ب باوەرم دێ ڤێجارێ رێژا پشکداریا کوردان د ھەلبژارتنێن پەرلەمانی دا گەلەک بیت، چونکو چەندین ھەلبژارتن ل ئیرانێ ھاتینە کرن و ھەتا نھا ژی چو کاریگەریا خوە ل باشبوونا بارێ ژیانا خەلکی نەکریە، بۆدجەیا کو بۆ پارێزگەھێن رۆژھەلاتێ کوردستانێ ژی دھێتە تەرخان کرن ھەموو جاران بۆ جھێن دی دھێتە مەزاختن و گۆت: (ب گەلەک رەنگان ل ئیرانێ زۆرداری ل کوردان دھێتە کرن، چونکو کوردان نوونەرێن خوە یێن راستەقینە ژی ل پەرلەمانی نینن نەشێن بەرەڤانیێ ژ مافێ خوە بکەن و ژ بەر ھندێ ژی ھەکە بەرەیێ یەکگرتی یێ کوردی بشێت کارەکێ وەسا بکەت ئەو یەک دێ کاریگەریەکا مەزن ل چارەکرنا پرسا کوردی کەت، لێ وەکو من دیار کری گەلەک سازی و میکانیزم ل ئیرانێ ھەنە کو ناھێلن کورد نوونەرێن خوە یێن راستەقینە بھنێرنە پەرلەمانی).
ناڤھاتی د دووماھیا ئاخڤتنا خوە دا ژی ئەو یەک دیار کر کو نھا ھەرێما کوردستانێ بەر ب راگەھاندنا دەولەتا کوردی دچیت و نێرینا جیھانێ ل ھەمبەر کوردان ھاتیە گوھۆرین و رۆژانە سەرکردێن وەلاتێن جیھانێ سەرەدانا ھەرێما کوردستانێ دکەن، ئەو ھەموو گوھۆرین و پێشڤەچوونێن کو سەبارەت ب کورد و کوردستانێ دروست بووینە ب رەنگەکێ راستەوخوە کاریگەریا خوە ل رۆژھەلاتێ کوردستانێ کریە، لێ ژ بەر سیاسەتا کو ئیران ل ھەمبەر کوردان برێڤە دبەت و ئاستەنگیێن کو ل ھەمبەر خەباتا سیاسی و مەدەنی یا خەلکێ رۆژھەلاتێ کوردستانێ دروست کریە مخابن ل رۆژھەلاتێ کوردستانێ بێدەنگیەکا گەلەک مەزن ھەیە و گۆت: (رۆژانە لاوێن کورد ل بەر چاڤێ جیھانێ دھێنە سێدارەدان و کەس دەنگێ خوە ناکەت، کوردێن رۆژھەلاتێ بێ خوەدان ماینە و وەلاتێن رۆژئاڤا و ئەمریکا ژی ژ بەر بەرژەوەندیێن خوە ل ھەمبەر کریارێن ئیرانێ بێدەنگ ماینە).