کوردێن رۆژئاڤایێ کوردستانێ بەرهەڤیان بۆ قۆناغەکا دیرۆکی دکەن
بەرپرسەکێ کورد دیار دکەت دێ دووماهیا ڤێ مەهێ رێککەفتنا هەر دو جڤاتێن کوردی هێتە راگەهاندن و نها بەرهەڤی بۆ کۆنگرێ کوردی ل رۆژئاڤایێ کوردستانێ دهێتە کرن و دێ هەموو ئالیێن سیاسی و کەسایەتیێن ناڤدار پشکداری کۆنگرەی بن.
ئاراس جومعە بەرپرسێ راگەهاندنا پارتا کەسک یا دیموکرات ل رۆژئاڤایێ کوردستانێ دیار کر، رێککەفتنا د ناڤبەرا پەیەدێ و ئەنجوومەنێ نشتیمانی یێ کوردی ل سووریێ دا، دێ دووماهیا ڤێ مەهێ هێتە راگەهاندن و نها کارێن گەلەک باش ژی دهێنە کرن و گۆت: (بێگومان رێککەفتنا هەر دو هێزێن مەزن یێن رۆژئاڤایێ کوردستانێ گەلەک گرنگە و پێنگاڤەکا دیرۆکی یە، بەری نها ژ بەر ناکۆکیێن د ناڤبەرا هەر دو هێزێن مەزن یێن کوردی دا گەلەک زیان گەهشتنە رۆژئاڤایێ کوردستانێ، لێ نها ئەو یەک نەما و هەر دو ئالیان ژی شیاینە پڕانیا پرسێن هەی د ناڤبەرا خوە دا چارەسەر بکەن و دهێتە چاڤەرێکرن، کو دووماهیا ڤێ مەهێ ژی رێککەفتنا پەیەدێ و ئەنجوومەنێ نشتیمانی یێ کوردی ل سووریێ بهێتە راگەهاندن).
ناڤهاتی ئەو یەک ژی دیار کر، ئێک ژ کارێن هەری باش و هەتا مرۆڤ دشێت بێژیت ئێک ژ بەرهەمێن وێ رێککەفتنێ ژی بێگومان سازکرنا کۆنگرێ کوردی یە ل رۆژئاڤایێ کوردستانێ، نها بەرهەڤیێن باش هاتینە کرن و هەکە چو ئاریشەیێن مەزن روو نەدەن دهێتە چاڤەرێکرن کو د دەمەکێ نێزیک دا ب پشکداریا هەموو هێز و ئالیێن سیاسی یێن رۆژئاڤایێ کوردستانێ و کەسایەتیێن ناڤدار یێن کورد کۆنگرێ کوردی یێ رۆژئاڤایێ کوردستانێ بهێتە ساز کرن و گۆت: (بێگومان دەمێ کۆنگرێ کوردی بهێتە ساز کرن دێ ئیرادەیەکا بهێز یا کوردی دروست بیت، ئێک ژ ئارمانجا کۆنگرەی ژی دروستکرنا شاندەکێ کوردی یە بۆ دانوستاندنان ل گەل شامێ، دڤێت کورد وەکو ئێک شاند ل گەل شامێ دانوستاندنان بکەن، پشتی کۆنگرەی ژی بێگومان دێ ئەو یەک هێتە کرن و نها هەموو وەلاتیێن کورد یێن رۆژئاڤایێ کوردستانێ ژ رێککەفتنا هەر دو هێزێن مەزن یێن کوردی ل رۆژئاڤایێ کوردستانێ دلخوەشن و چاڤەرێی راگەهاندنا رێککەفتنا پەیەدێ و ئەنجوومەنێ نشتیمانی یێ کوردی ل سووریێ نە).
ئەو یەک د دەمەکێ دایە کو بەری چەند رۆژان محەمەد ئیسماعیل سەرۆکێ ئەنجوومەنێ نشتیمانی یێ کوردی ل سووریێ ژی دیار کربوو، کو د دەمەکێ نێزیک دا دێ رێککەفتنا وان و پەیەدێ هێتە راگەهاندن و کورد دێ وەکو ئێک شاند ل گەل شامێ دانوستاندنان کەن.
