کورد دخوازن پرسا کوردی ب ئاشتیێ بهێته چارەسەرکرن
ل گۆر ئەنجامێ ڤەکۆلینا ناڤەندەکا ڤەکۆلینان ل باکورێ کوردستانێ کورد داخوازا راگرتنا شەڕی و چارەسەرکرنا پرسا کوردی دکەن، وەلاتی دخوازن ب رێیا پەرلەمانێ تورکیا پرسا کوردی بهێتە چارەسەرکرن، چونکی رەوشا نها کاریگەریەکا گەلەک خراب ل ژیانا وان کریە و دڤێت پرسا کوردی ب رێیا ئاشتیێ بهێتە چارەسەرکرن.
ناڤه‌ندا ڤه‌کۆلینێن هزری یا spectrum house ل 15 باژێرێن باکورێ کوردستانێ ل سه‌ر پرسا کورد ڤه‌کۆلینه‌کا به‌رفه‌ره‌ه کر و پاشی ئه‌نجامێن ڤه‌کۆلینا خوه ژ بۆ رایا گشتی ئاشکرا کر. د راپۆرتا ناڤه‌ندا ڤه‌کۆلینێن هزری دا هاتیه راگه‌هاندن کو ل 15 باژێرێن باکورێ کوردستانێ وان ل گەل وه‌لاتیێن کورد هەڤدیتن کرینە و د ئه‌نجام دا نێزیکی 80٪ وه‌لاتیێن کورد داخوازا چارەسەرکرنا پرسا کوردی ب رێیا دیالۆگێ و ئاشتیێ کرینه، هه‌روه‌سا وه‌لاتیێن کورد دیار ژی کرینه کو دڤێت ب ده‌ستپێشخه‌ریا په‌رله‌مانێ تورکیا و ب پشته‌ڤانیا ده‌ستهه‌لاتێ و سازیێن جڤاکێ سڤیل وه‌ک سالا 2013 جاره‌کا دی قۆناغا ئاشتیێ بهێته ده‌ستپێکرن.
د پشکه‌کا دی یا راپۆرتا هەمان ناڤەندێ دا ئەو یەک ژی هاتیە دیار کرن، کو ژ ئه‌نجاما ڤه‌کۆلینا وان ئاشکرا بوویە پرانیا وه‌لاتیێن کورد وه‌سا دبینن ژ به‌ر کو هەتا نها پرسا کوردی نه‌هاتیه چارەسەرکرن ره‌وشا ئابووریا تورکیا خراب بوویه و داخوازێ ژ ئالیێن شه‌ر کرینه، کو ب دانوستاندنان پرسا کوردی چارەسەر بکه‌ن.
هه‌روه‌سا ل گۆر ڤه‌کۆلینا ناڤه‌ندا ڤه‌کۆلینێن هزری پشکه‌ک ژ وه‌لاتیێن کورد ژ سیاسه‌تا هەدەپێ ژی نه‌رازینه و داخوازا سیاسه‌ته‌کا نوو و زەلال ژ هەدەپێ کرینه و راگه‌هاندینه کو ئه‌و ژ سیاسه‌تا نها یا ده‌ستهه‌لاتێ ژی نه‌رازینه. وه‌لاتیێن کورد د هه‌ڤدیتنێن ل گەل ناڤەندا ناڤهاتی دا ئەو یەک ژی دیار کرینه، کو ژ به‌ر شه‌ڕی و ئالۆزیێن نها، رەوشا وان ژی گەلەک خراب بوویە، چونکی شەڕی کاریگەریەکا خراب ل ژیانا وان کریە، رێژەیا بێکاریێ گەلەک زێدە بوویە و هەروەسا ئەو کوردێن ژ نەچاریێ چووینە باژێرێن مەزن یێن تورکیا ژی نها د رەوشەکا گەلەک خراب دا دژین، ژ بەر هندێ ژی چو رێیێن دی نینن و دڤێت پرسا کوردی بهێتە چارەسەرکرن دا رەوشا تورکیا ژی یا ئارام بیت.
ناڤه‌ندا ڤه‌کۆلینێن هزری ڤه‌کۆلینێن خوه ل 15 باژارێن باکورێ کوردستانێ یێن وه‌ک، ئامه‌د، وان، مێردین، ئه‌رزرۆم، باتمان، جۆله‌مێرگ، روحا، شه‌رنه‌خ، سه‌مسور، سێرت، ئاگری، به‌دلیس، موش، قه‌رس و دێرسیمێ کریه د ڤێ ڤەکۆلینێ دا نێزیکی دو هزار کەس پشکدار بووینە و بەرسڤا پرسێن ناڤەندا ڤەکۆلینان داینە.
ئەو یەک د دەمەکێ دایە کو بەری نها ژی چەندین ناڤەندێن ڤەکۆلینان ل تورکیا سەبارەت ب رەوشا نها و داخوازیێن وەلاتیان چەندین راپرسی کربوون و د ئەنجاما راپرسیان دا دیار ببوو، کو ئێک ژ داخوازیێن سەرەکی یێن وەلاتیێن کورد چارەسەرکرنا پرسا کوردی و راگرتنا شەڕی یە، چونکی وەلاتی وەسا دبینن ژ بەر شەڕێ نها رەوشا دەڤەرێن وان گەلەک ئالۆزە و ئەو نەشێن ب رەنگەکێ ئاسایی بژین، چونکی شەڕی کاریگەری ل ژیانا وان یا کری و ب تایبەتی ژی نها داهاتێ وان نینە، هەکە شەڕ بهێتە راگرتن و هەروەسا گرنگی ب دەڤەرێن کوردی ل باکورێ کوردستانێ بهێتە دان دێ رەوشەکا نوو هێتە پێش و ئەو یەک دێ بیتە ئەگەرێ کێمکرنا بێکاریێ و بێگومان دێ رەوشا ئابووری یا دەڤەرێن کوردی گەلەک باشتر لێ هێت و ئەو یەک دێ کاریگەریا خوە ل سەر رەوشا گشتی یا تورکیا ژی کەت.
