کورد دژی پێکئینانا ھێزا زێرەڤانێن نیشتیمانی نە
ھەولێر، قائید میرۆ:
ھژمارەکا پەرلەمانتارێن عەرەب پرۆژەیەک بەرھەڤکریە کو ل دووڤ وی پرۆژەی دێ گۆھۆڕین بسەر ھێزێن سەربازی و ئەمنیێن عیراقێ دا بھێن و ھێزەکا نوو بناڤێ زێرەڤانێن نیشتیمانی ھێتە پێکئینان، نوونەرەکێ کورد ژی دبێژیت، ئەم وەک کورد دژی ئەڤی پرۆژەینە و رازینابین سەربگریت.
پێکئینانا ئەڤێ ھێزا بناڤێ زێرەڤانێن نیشتیمانی پشتی ڤێ چەندێ ھات، کو ژبەر ڤالاھیا ئەمنی و نەبوونا سوپایەکێ بەرگریکار، رێکخراوا تیرۆرستیا داعش ھژمارەکا دەڤەرێن عیراقێ کۆنتڕۆلکرن و سوپایێ عیراقێ ل سێ پارێزگەھان ئامادەنەبوو بەڕەڤانیێ بکەت، ب گورەی ناڤەڕۆکا پڕۆژەی بۆ ھەر پارێزگەھەکێ دێ ھێزەکا تایبەت ژ خەلکێ پارێزگەھێ ھێتە پێکئینان و نابیت وەلاتیێ پارێزگەھەکێ بچیتە پارێزگەھەکا دی یا عیراقێ بەرگریێ بکەت، چاڤدێرێن سیاسی دبێژن، پێکئینانا ئەڤێ ھێزا نوو زیانێن مەزن بۆ کەرکووکێ ھەنە و رێژەکا مەزن یا عەرەب و ترکمانان دێ ھێتە دامەزراندن.
دکتۆر تارق گەردی، پەرلەمانتارێ کورد ل بەغدا بۆ ئەڤرۆ دبێژیت” بەری نوکە ئەڤێ ھێزێ ناڤەکێ دی ھەبوو، بەلێ ھاتە گۆھۆڕین بۆ زێرەڤانێن نیشتیمانی، ئەڤ پرۆژە ژ ئەنجامێ ئەڤێ چەندێ ھاتیە کو ددەمێ بۆری دا دەرکەفت کو عەرەبێن شیعە مەزھەب د بەرھەڤ نینن بەڕەڤانیێ ژ دەڤەرێن سوننی بکەن و چەندین باژێڕ و دەڤەرێن گرنگ سوپایێ عێراقێ بۆ داعش ھێلان، ئەڤە ژی بێ چو شەڕ و پێکدادانەک د نیاڤبەرا چەکدارێن داعش و سوپایێ عیراقێ پەیداببیت، ھەروەسا ئەفسەر و سەربازێن شیعە ب ئاشکرا دبێژن، ئەم بەڕەڤانیێ ژ دەڤەرێن سوننە مەزھەب ناکەین، لەوڕا پرۆژەک ھاتە بەرھەڤکرن و نوکە یێ کار تێدا دکەن، بەلێ ب دیتنا مە یێ سەرکەفتی نابیت و سەرناگریت”.
دکتۆر تارق گوتژی” ھەکە سەرکردێن عیراقێ داخوازا ئێکەتیا عیراقێ دکەن، نابیت ئەڤ جۆداھیە بھێتەکرن، ھێشتا ئەف پرۆژە نەھاتیە پەرلەمانی، لێ ھەردەمێ ھات ئەم کورد رێ نادەین سەربگریت و دێ دژی راوەستین، چونکو مە ئاریشا کەرکووکێ ژی ھەیە، ھەکە ب گورەی پرۆژەی بیت، کورد دێ د زیاندار بن، ژ بەرکو پتریا خەلکێ کەرکووکێ کوردە، بەلێ پۆستێن پارێزگەھێ وەک ئێک ھاتینە بەلاڤکرن، ئەڤە ژی دێ بیتە ئەگەرێ ڤێ چەندێ چەند کورد بھێنە دامەزراندن وەک زێرەڤانێن نیشتیمانی، دڤێت عەرەب و ترکمان ژی وەکو کوردان بن و کورد رازینابین بڤی شێوەی، چونکو رێژەیا کوردان گەلەک یا پترە نەتەوێن دی.
