کۆتلا چاکسازیێ: د رژین عەبادی و دەستەیا سەرۆکاتیا پەرلەمانی بھێنە گوھۆڕین
ئەڤرۆ نیوز:
پەرلەمانتارەکا کورد ل کۆتلەیا چاکسازی کو بەری نوکە ب کۆتلا پەرلەمانتارێن مانکگرتی دھاتنە نیاسین ئاماژە بڤێ چەندێ دکەت، کو سەرەدانا شاندێ کۆتلا چاکسازی بۆ ھەرێما کوردستانێ بەرسڤێن ئەرێنی وەرگرتینە و ئەم رژدین لسەر گۆھۆڕینا دەستەیا سەرۆکایەتیا پەرلەمانی و لادانا عەبادی ژ پۆستێ سەرۆک وەزیران، ھەروەسا دبێژیت ئەم دێ بەڕەڤانیێ ل پێگەھێ کورددا بکەین ل حوکمەتا عێراقێ و پێدڤیە کورد نەبنە ئەگەرێ رێگریێ ل پڕۆسا چاکسازیا سیاسی ل عێراقێ.
تاڤگە ئەحمەد میرزا، ئەنداما کۆتلا چاکسازی ل پەرلەمانێ عێراقێ بۆ رۆژناما ئەڤرۆ گۆت” کۆتلا پەرلەمانتارێن مانگگرتی بۆیە ئێک کۆتلە و ژ 107 پەرلەمانتاران پێکھاتیە، کو ددەمێ نوکەدا مەزنترین کۆتلا پەرلەمانێ عێراقێ یە، شاندەکێ کۆتلا چاکسازی سەرەدانا ھەرێما کوردستانێ کریە و دگەل سەرۆک بارزانی و پەرلەمانتارێن کورد ل بەغدا کۆمبوویە، ئەوژی ب مەرەما کاراکرنا پەرلەمانێ عێراقێ، مە کۆتلا چاکسازی چو بەرژەوەندیێن شەخسی نینە و تنێ دخوازین پەرلەمان دەست بکارێن خوە بکەت، گورەی ئەنجامێن کۆمبوونێ شاندێ چاکسازی زۆر ژ ھەلویستێ سەرۆک بارزانی وەک سەرۆکێ ھەرێما کوردستانێ و پەرلەمانتارێن کورد رازینە، راستە واناژی ھندەک گازندە ھەبوون لدۆر بۆیەرێن ڤێ دووماھیێ، بەلێ بلا پەرلەمان بھێتە کاراکرن و ئەڤ مافێن کورددا ھەی ب رێیا پەرلەمانی بھێنە ب دەستڤەئینان و ناخوازین کورد ببنە رێگر ھەمبەری پڕۆسا چاکسازیێ ل عێراقێ بەرۆڤاژی دخوازین فاکتەرێ چاکسازیا سیاسی ل عێراقێ، راستە مە کوردان داخوازی ھەنە، لێ راستی ھندەک کار یێن پەرلەمانی نینە، بەلکۆ پێدڤیە رێککەفتن د ناڤبەرا حوکمەتا عێراقێ و ھەرێمێ دا ب ھێتەکرن بۆ چارەسەرکرنا ئەڤان پرسا، چونکە بەری نوکە ئەز دگەل ھژمارەک پەرلەمانتارێن ھەرێمێ ئاخفتی مە و دبێژن، ھەتا مووچێ پێشمەرگە و فەرمانبەران نەھێتە مەزاختن و ماددێ 140 نەھێتە بجھئینان ناڤەگەڕین بۆ بەغدا.
تاڤگێ گۆتژی” مە بۆ رەوشا نوکە پەرلەمان تێدا دەربازدبیت داخوازکریە، کۆمبوونەکا پەرلەمانی بۆ ھەموو پەرلەمانتاران ب ھێتەگرێدان و پەرلەمانتارەک ئەڤێ کۆمبوونێ برێڤەببەت و تێدا دەستەیەکا نوو بۆ سەرۆکایەتیا پەرلەمانێ عێراقێ بھێتە ھەلبژارتن و دەستەیا بەرێ نەمینیت، ئەم درژدین لسەر لادانا سەرۆک و جێگرێن سەرۆکێ پەرلەمانی، مە وەک کۆتلا چاکسازی بڕیاردایە کەس ل ئەندامێن کۆتلێ ب کورد و عەرەب ڤە خوە بەربژێرناکەن، بلا پەرلەمانتارێن دی خوە ھەلبژێرن، یا راست مە نەڤێت تەوفقا بەرێ بمینیت، دگەل ڤێ چەندێ مافێ کوردان یێ پاراستی ژ سەرجەمێ 107 پەرلەمانتارێن کۆتلا چاکسازی تنێ ئەم دو ئەندام کوردین، کارێ تنێ بەڕەڤانیە ل پێگەھێ کوردان، ھەکە جێگرێ دویێ سەرۆک پەرلەمانی بەھرا کوردایە، بلا کوردەک بھێتە دانان، بەلێ گرنگ نینە ئەف کوردە کیە، بۆ پۆستێن دی ھەمان بۆچوون مە ھەیە، پێدڤیە سەرۆک وەزیرێن عێراقێ بھێتە گۆھوڕین و عەبادی نەمینیت د پۆستێ خوەدا.