کۆمسیۆن:هەلوەشاندنا ده‌نگان ده‌ستهه‌لاتا دادگه‌ها فيدرالى يه
ئه‌ڤرۆنيوز:
كۆمسيۆنا بلند يا هه‌لبژارتنان ل عيراقێ راگه‌هاند كو ئه‌و ل دووڤ بريارا جڤاتا نوونه‌ران ناچيت ئه‌وا تايبه‌ت ل هه‌لوه‌شاندنا پشكه‌ك ژ ئه‌نجامێن هه‌لبژارتنان وجوداكرن وهژمارتنا 10% ژ ده‌نگان ل هه‌ر پاريزگه‌هه‌كێ.
كۆمسيۆنا هه‌لبژارتنێن عيراقێ ل دۆر بريارا جڤاتا نوونه‌ران بۆ هه‌لوه‌شاندنا ئه‌نجامێن هه‌لبژارتنان راگه‌هاند، تنێ دادگه‌ها فيدرالى دشێت ئه‌نجامێن هه‌لبژارتنان ب هه‌لوه‌شينيت وئه‌و 1021 ويستگه‌هێن ده‌نگێن وان هاتينه ره‌تكرن، پێشتر ژى دراگه‌هاندنێ ئه‌نجامێن وان نه‌هاتبوونه هه‌لبژارتن.
ئه‌ڤرۆ پێنجشه‌مبى 31/5/2018 كۆمسيۆنا بلند يا هه‌لبژارتنان كۆنگره‌كێ رۆژنامه‌ڤانى سازكر وتێدا رياز به‌دران سه‌رۆكێ فه‌رمانگه‌ها هه‌لبژارتنان گۆت” ئه‌ڤرۆ دووماهى رۆژا پێشكێشكرنا تانا بوو ل سه‌ر هه‌لبژارتنان ودڤى ماوه‌ى دا 1875 تانه ژلايێ به‌ربژار وليستان ڤه هاتينه تۆماكرن”.
رياز به‌دران رۆهنكر ژى” ده‌سته‌يا دادوه‌رى دێ پێداچوونێ ل وان تانا كه‌ت ول ده‌مێ 10 رۆژان دێ دووڤچوون ل سه‌ر هێته كرن وپاشى ئه‌نجامێ دووماهيێ يێ ده‌نگدانێ ل رۆژناما فه‌رمى دێ هێته به‌لاڤكرن”.
دياركر ژى” ل دووڤ وێ ميكانيزما هه‌ى كو 1021 ويستگه هاتينه هه‌لوه‌شاندن كو پتريا ويستگه‌هێن ده‌رڤه‌ى وه‌لاتى نه وژسه‌رجه‌مێ 493 ويستگه‌هێن ده‌نگدانا ئاواران ژى 411 ويستگه‌ه هاتينه هه‌لوه‌شاندن”.
گۆت ژى” هه‌موو لايه‌كى پشت راست دكه‌ين ژروويێ ته‌كنيكى ڤه پرۆسه يا باش بوو وئاميرێن ئه‌لكترۆنى وئه‌نجامێن دناڤ سندووقان دا ئێكن وجوداهى نينه”.
ئاماژه دا” ئه‌م ب گۆره‌ى قانوونا هه‌لبژارتنان وجڤاتا كۆمسياران كار دكه‌ين وبريارێ دده‌ين، جڤاتا نوونه‌ران ولايه‌نێن دى رێز ل ده‌ف مه يا هه‌ى، به‌لێ هه‌لوه‌شاندنا ده‌نگان تنێ دادگه‌ها فيدرالى ئه‌و ده‌ستهه‌لات يا هه‌ى وچو لايه‌نه‌كێ دى ئه‌و ده‌ستهه‌لات نينه”.
