کۆمپانیێن بیانی ب مەرەما وەبەرئینانێ ڤەگەڕیاینە کوردستانێ
ھەولێر، قائید میرۆ:
کۆمپانیێن بیانی ب مەرەما وەبەرئینانێ د کەرتێ پەتڕۆلا ھەرێما کوردستانێ دا دوبارە ڤەگەڕیاینە ھەرێما کوردستانێ و بسپۆرەک ژی ئاشکرا دکەت کو ھەرێما کوردستانێ ژ لایێ ئێمناھیێ ڤە یا سەقامگیرە بۆ کۆمپانیێن بیانی.
دکتۆر سیروان عەرەب، بسپۆرێ کەرتێ پەتڕۆلێ بۆ رۆژناما ئەڤرۆ گۆت: “ئەڤ کۆمپانیێن بەری نوکە د کەرتێ پەتڕۆلا ھەرێما کوردستانێ دا کار دکر و ژ ئەگەرێ داکەفتنا بھایێ پەتڕۆلێ و شەڕێ بەرھنگاریا داعش کوردستان بجە ھێلابوون، نوکە ئەڤ کۆمپانیێن بیانی یێن د کەرتێ پەتڕۆلێ دا کار دکەن؛ یێن ڤەدگەڕنە ھەرێما کوردستانێ ڤە و دەست ب کارێ خوە دکەن بۆ ئەنجامدانا وەبەرئینانێ د پەتڕۆلا ھەرێما کوردستانێ دا”.
گۆتژی: “نوکە ژ لایێ ئێمناھیێ ڤە ھەرێما کوردستانێ چو ئاریشە نینن و سەقایەکێ گونجای یێ ھەی بۆ کارکرنا کۆمپانیێن بیانی، کۆمپانیێن بیانی یێن بەری ھاتنا شەڕێ داعش رێککەفتن دگەل ھەرێما کوردستانێ ھەبووین ھەموو دوبارە ڤەگەڕیاینە”.
دکتۆر سیروان عەرەب ئاماژە ب وێ چەندێ ژی کر کو ڤەگەڕیانا مەزنە کۆمپانیێن بیانی بۆ ھەرێما کوردستانێ و بەردەوامیدان ب وەبەرئینانێ د کەرتێ پەتڕۆلێ دا دێ کاریگەریێن زۆر مەزن ل سەر کەرتێ پەتڕۆلا ھەرێما کوردستانێ ھەبن و گۆت: ”پاشەڕۆژەکا گەش چاڤەڕێی ئەڤان پێنگاڤانە بۆ زێدەکرنا بەرھەمێ پەتڕۆلا ھەرێما کوردستانێ و بلندکرنا رێژا ھنارتنا پەتڕۆلێ، لەوڕا ژی ئەز یێ گەشبینم ب ڤەگەڕیانا کۆمپانیێن بیانی و دێ جھێ دەستی وان ل سەر کەرتێ پەتڕۆلێ دیاربیت و ئەڤ کەرتێ گرنگ دوبارە دێ ڤەژیت”.