کۆمپانیەکا راپرسیان: خەلک پشتەڤانێن قووناغا ئاشتیێ نە
کۆمپانیا سامەر یا راپرسیان ل تورکیا دیار کر کو وان دەست ب راپرسیەکا مەزن و بەرفرەه ل پڕانیا باژێرێن تورکیا کرینە و د ئەنجاما راپرسیێ دا دیار بوویە کو نێزیکی ٨٠٪ ژ پشکداربوویێن راپرسیێ پشتەڤانیا خوە بۆ راگرتنا شەڕی و ئاشتیێ ل تورکیا دیار کرینە.
هەمان کۆمپانیێ ئەو یەک ژی دیار کریە، پشکداربوویێن راپرسیێ وەسا دبینن کو دەرئێخستنا یاسایا ئاشتیێ ل پەرلەمانێ تورکیا ب تنێ بەس نینە و دڤێت ب کریاری کار بۆ چارەسەرکرنا پرسا کوردی ل تورکیا بهێتە کرن و نابیت دەولەتا تورکیا ب رەنگەکێ تەکتیکی نێزیکی قووناغا نها ببیت.
ل گۆر کۆمپانیا سامەر وەلاتیێن کورد وەسا دبینن کو دڤێت دەولەتا تورکیا گەلەک ئاسانکاریان بۆ ڤەگەرا سیاسەتمەدارێن کورد یێن ل دەرڤە بکەت و هەروەسا دڤێت د زووترین دەم دا سەلاحەدین دەمیرتاش و گرتیێن دی یێن سیاسی بهێنە ئازاد کرن، هەروەسا دڤێت سیاسەتا قەیوومان ژی ل تورکیا ب دووماهی بهێت و رێز ل ئیرادەیا گەلێ کورد بهێتە گرتن.
