کۆمەلە ئیسلامی و ئێکگرتوو رەخەنە ل شاندێ ئیکەتی و گۆڕانێ بۆ بەغدا گرتن
ئەڤرۆ نيوز:
چوونا شاندێ ھەڤپشکێ ئێکەتی نشتیمانی کوردستان و تەڤگەرا گۆڕان بۆ بەغدا و روونشتن ل گەل مەزنە بەرپرسێن عیراقی، بۆچوونێن جودا ل مەیدانا سیاسی ل کوردستانێ و عیراقێ ل پشت خوە ھێلاینە.
نەجیبە نەجیب ئەنداما پەرلەمانێ عیراقێ ژ فڕاکسیونا پارتی دیموکراتی کوردستان، بۆ رۆژناما ئەڤرۆ گۆت: نابینم کێشێن کوردان ئەوێن ھەتا نوکە ھەلاویستی و تایبەت پێشمەرگە و بودجە و پەترۆل ب سەردانا ڤی شاندێ ئێکەتیێ و گۆڕان بھێتە چارەسەرکرن و چو گوھۆڕین ل ھەلویستێ بەغدا بەرامبەر کوردان ناکەت، چونکە حوکمەتا بەغدا بەری نوکە دیارکریە کو دڤێت بزانیت چەند پارە بۆ فەرمانبەران دچیت و چەند دھێتە مەزاختن و دبینم بڤی شاندنی چو ھەلویستێ بەغدا ناھێتە گوھۆرین و دا باشتر بیت شاندەکێ ھەڤپشک د ناڤبەرا ھەموو ئالیێن سیاسیێن کوردستانێ دا سەردانا بەغدا کربا و نەبتنێ بۆ راگەھاندنێ چووبا و دبینم چوونا ڤی شاندنی پتر بۆ راگەھاندنێ بوویە ژ چارەسەکرنا کێشێن ھەلاویستی.
ئەحمەد حاجی رەشید، سەرۆکێ فڕاکسیۆنا کومەلا ئیسلامی کوردستان ل پەرلەمانێ عیراقێ گۆت: بەرژوەندیێن حزبی بووینە ھوکارێ دو بەرەکیا کوردان ل بەغدا، کورد ئێدی ل بەغدا دێ خودانێن زێدەتری دو بۆچوونان بن، بۆچوونەکا ئێکەتیێ و گوران پێکڤە و بۆچوونەکا پارتی و بۆچوونەکا پارتێن ئیسلامی ئێکگرتوو ئیسلامی و کومەلا ئیسلامی و ئەڤە دێ بوو پێگەھێ کوردان زیان ھبیت و دێ لاوازبن و پێشتر کورد ئێک دەنگ بووینە ل بەغدا.
ناڤبری ئەو ژی گۆت: من رەخنە ل شێوازێ رونشتنێ یێ شاندنێ ھەڤپشکێ ئێکەتیێ و گوران ھەیە بۆ بەغدا و کورد ئێدی ب دو ئاراستان دێ چیتە بەغدا و ئەڤە ژی عەیبەکا مەزنە.
بلال سەعید، رۆژنامەڤانێ ئابووری دیاردکەت، گوھۆڕینێن ئابووری ب ئێک رێزی و ئێک دەنگیێ دھێن و ھەکە چوونا شاندنی بتنێ بۆ پارێزگەھەکێ یان دەڤەرەکێ بیت دبینم کارەکێ خرابە، دێ داھاتی بڕیارا سیاسی و ئابووری یا ھەرێمێ بەرامبەر بەغدا لەنگ کەت، بتنێ دبیت بەرژوەندیا حزبی پتر ھەبیت و بەرچاف ھاتبیتە وەرگرتن و ئەڤە دێ یا دەمکی بیت و ئابووری وی دەمی دێ ب ھێز کەڤیت ھەکە دەستێ ھەموو ئالیان ل نافخوە ئێک بیت بەرامبەر دەرڤە.
ژ ئالیەکێ دی ڤە، موسەنا ئەمین سەرۆکێ فڕاکسیۆنا ئێکگرتوو ئیسلامی کوردستان ل بەغدا گۆت: دبینم چوونا شاندێ ھەڤپشکێ گۆڕان و ئێکەتیێ بۆ بەغدا و کۆمبوون ل گەل لایەنێ، سیاسێن عیراقی ئاسایی نینە و ئەڤە دێ بیتە ئەگەرێ دەرزبوونا ناف مالا کوردی.
ھەڤدەم، ئامینا زکری، جێگرا سەرۆکا فراکسیۆنا پارتی ل پەرلەمانێ کوردستانێ، دپەیچێ خوە یێَ تایبەتێ فەیسبوکی دا دیارکریە کو سەرەرایی ھەموو ناکوکیێن دناڤبەرا ھێزێن سیاسی دنافخوە یا ھەرێمێ دا، لێ ئێک رێزی و ئێک گوتاریا ھێزێن کوردستانێ ل بەغدایێ سەر پرسێن نشتیمانی جھێ دلگەرمیا خەلکێ کوردستانێ بوو، لێ رێککەفتنا گۆڕان و ئێکەتیێ دەر ئێخستە دئێک گوتاریا کوردستانێ دا وەک ئەو دبێژن نەبتنێ بۆ سەقامگێریا و ئێکرێزیا ناڤ مالا کوردستانێ دا نەبوو، بەلگو بۆ تێکدان و دروستکرنا دو بەرەکیێ یە، ھەر دو ھێزان گۆتیە بەغدا ژ عیراقێ جودانابن و ێ ل گەل ئێک پارچەیا عیراقێ بن و کا چەوا ب کریار ل گەل سەربەخوەیا کوردستانێ نین و کار بۆ دکەن، ب ئاشکرا بلا پرێس کونفرانسەکی دا بۆ خەلکێ کوردستانێ ورایا گشتی دیار بکەن کو کو ل گەل دەولەتا کوردی نین.
