کۆچبەر پارەکێ زۆر ددەن داکو ژ ئورۆپا ڤەگەرنە ئەفریقیا

ئەڤرۆ نیوز:

بەری نوکە کۆچبەرێن ئەفریقی، ژیانا خوە د ئێخستە د مەترسیێ دا، داکو بگەهنە وەلاتێن ئورۆپی، نوکە ب ئەگەرێ بەلاڤبوونا ڤایرۆسێ کۆرۆنا، ئەو یێ ئورۆپا بجهـ دهێلن و یێ ڤەدگەرنە وەلاتێن خوە ل ئەفریقیا.

نوکە ڤایرۆسێ کۆرۆنا گەلەک ل ئیسپانیا بەلاڤبوویە، نوکە پتر ژ 200 هزار کەسان ل وی وەلاتی تووشی کۆرۆنا یێ بووینە و پتر ژ 20 هزار کەسان ژی گیانێ خوە ژ دەستدایە.

ل دووماهیا هەیڤا بوری نێزیکی 100 کۆچبەران ب دو بەلەمێن لاستیکی ژ ئیسپایا ڤەگەریاینە مەغرب، هەر ئێک ژ وان کۆچبەران پێنج هزار و 400 یۆرۆ داینە قاچاخچیان داکو وان ڤەگەریننە وەلاتێ وان، هەر چەنده هەر ئێکێ ژ وان کۆچبەران هەتا گەهشتینە ئورۆپا 400 هەتا هزار یۆرۆ دابوون.

هەتا نوکە زێدەتر ژ 199 هزار کەسان ل ئیتالیا تووشی ڤایرۆسێ کۆرۆنا یێ بووینە و زێدەتر ژ 26 هزار کەسان گیانێ خوە ژ دەستداینە، ڤێ چەندێ وەکریە کو کۆچبەرێن ئەفریقی وی وەلاتی بجهـ بهێلن و ڤەگەرنە وەلاتێن خوە.
هەروەسا ڤایرۆسێ کۆرۆنا یێ کارتێکرنەکا مەزن ل سەر فرەنسا، بریتانیا و ئەلمانیا کریە، لەوما ل وان وەلاتان ژی کۆچبەر یێ بزاڤێ دکەن پارەکی زۆر بدەن، داکو قاچاخچی وان ڤەگەریننە وەلاتێن وان ل ئەفریقیا.

کۆمێنتا تە