کۆڤارا تایمز یا ئەمریکی: عیراق نەما و دەولەتا کوردی برێڤە یە
ئەڤرۆ:
کۆڤارا تایم یا ئەمریکی د راپۆرتەکێ دا دیار دکەت کو ئێدی چو واتەیا عیراقەکا ئێکگرتی نەمایە و دڤێت بەرپرسێن ئەمریکا ژی ڤێ یەکێ قەبوول بکەن، چونکو پێکھاتێن عیراقی نھا دژبەریا ھەڤدو دکەن و باوەریا وان ب ھەڤدو نەمایە و ژ بەر ھندێ ژی ھەکە عیراق بھێتە پارچە کرن رەنگە پشتی دەمەکێ ئارامی ل دەڤەرێ دروست ببیت بەس ھەتا عیراق ب زۆرێ وەک دەولەتەکا ئێکگرتی بمینیت دێ شەر و ئالۆزی ژی بەردەوام بن.
کۆڤارا تایمز یا ئەمریکی د ھژمارا خوە یا نوو دا بەحسێ رەوشا عیراقێ دکەت و ھاتیە دیار کرن کو چەندین سالن ئەمریکا و ھندەک وەلاتێن دی ژ بەر بەرژەوەندیێن خوە ب زۆرێ بزاڤێ دکەن عیراق وەک دەولەتەکا ئێکگرتی بمینیت، بەس رۆژ ب رۆژێ پارچەبوونا عیراقێ باشتر دیار دبیت و د شەرێ ل دژی داعشێ دا ژی دیار بوو کو عیراق دەولەتەکا ئێکگرتی نینە، چونکو ل عیراقێ دا سێ پێکھاتە ھەنە کو نھا وەک سێ دەولەتان سەرەدەریێ دکەن.
د بەردەوامیا راپۆرتێ دا ھاتیە دیار کرن کو کوردان ھەموو بنەمایێن دەولەتێ بۆ خوە ئاڤا کرینە و چاڤەرێ پشتەڤانیا دەرڤە نە دا دەولەتا خوە رابگەھینن، چونکو کورد دبێژن مە شیا ئەم شەرێ مەزنترین رێکخراوا تیرۆرستی ل جیھانێ بکەین و مە بەرەڤانی ژ ئاخا خوە کریە و مە ژیانا سەدھزاران پێکھاتێن دی یێن عیراقی ژی پاراستیە و ژ بەر ھندێ ژی ئێدی کوردان نەڤێت باجا ئالۆزیێن عیراقێ بدەن و دخوازن سەربخوە بن. نھا ژی کورد وەک دەولەتەکا سەربخوە سەرەدەریێ ل گەل بەغدا و ھەتا دەولەتێن ھەرێمی و جیھانی دکەن و د شەرێ ل دژی داعشێ دا ژی کوردان وەک دەولەتەکێ سەرەدەری کر و ئاخا خوە پاراست.
د پشکەکا دی یا راپۆرتێ دا ھاتیە دیار کرن کو سوننە ل عیراقێ شەرێ داعشێ ناکەن، چونکو ئەو دبێژن ھەکە نھا داعش نەبیت شیعە دێ مە ژناڤ ببەن و ژ بەر ھندێ ژی ئەو نھا ل ژێر سیبەرا شەرێ داعشێ خوە دپارێزن و ژ بەر ھندێ ژی ھەتا ئەمریکا و وەلاتێن رۆژئاڤا ب فەرمی پشتەڤانیێ ل سوننێن عیراقێ نەکەن و سۆزا ئاڤاکرنا دەولەت یان ژی ھەرێمەکێ نەدەنە وان گرتنا مووسل و گەلەک باژارێن دی ل عیراقێ ساناھی نابیت و ھەکە ب زۆرا شەری ژی ئەو باژار بکەڤنە دەستێ عیراقێ دێ دیسان شەر و ئالۆزی و کوشتن ل وان دەڤەران یا بەردەوام بیت.
ل ئالیێ دی ئاژانسا بی بی سی ژی راپۆرتەک سەبارەت ب سەرەدانا سەرۆکێ ھەرێما کوردستانێ بۆ ئەمریکا و رەوشا نھا ل عیراقێ بەلاڤ کریە و د راپۆرتێ دا ھاتیە دیار کرن کو ھەتا نھا ژی نەبیت دێ سالەکا دی ئەمریکا پشتەڤانیێ ل ئاڤاکرنا دەولەتا کوردی کەت، چونکو نھا پتر ژ ھەر دەمەکێ پەیوەندیێن ئەمریکا ل گەل ھەرێما کوردستانێ باشن و کورد بزاڤێ دکەن بەرژەوەندیێن خوە یێن ھەڤپشک ل گەل ئەمریکا رۆژ ب رۆژێ زێدەتر لێ بکەن و ژ بەر ھندێ ژی وی دەمی دێ بۆ ئەمریکا باشتر بیت کو دەولەتەکا کوردی یا ب ھێز ھەڤپەیمانێ وێ بیت و پارچەبوونا عیراقێ چو زیانێن وەسا مەزن ناگەھینتە ئەمریکا، لێ جارێ ئەمریکا کار ل سەر ھندەک خالێن دیتر دکەت و ناخوازیت دەمێ عیراق ھاتە پارچەکرن، پارچا ھەرا زەنگین یا عیراقێ کو شیعەنە بکەڤیتە د دەستێ ئیرانێ دا و ژ بەر ھندێ ژی راگەھاندنا دەولەتا کوردی رەنگە بۆ سالەک یان چەند سالێن دیتر گیرو کەڤیت.
