کەسایەتیەکێ ئێزدی داخوازا پارێزگەھبوونا شنگالێ دکەت
ئەڤرۆ:
کەسایەتیەکێ ئێزدی رەخنە ل حوکمەتا عیراقێ گرتن کو چو ھاریکاری بۆ شنگالێ نەکریە پشتی کونترۆلکرنا وێ ژلایێ تیرۆرستێن داعشێ ڤە و دیارکر ژی بەری ھاتنا داعشێ ژی، حوکمەتا عیراقێ چو بۆ دەڤەرا شنگالێ نەکریە، بەلکو تنێ حوکمەتا ھەرێما کوردستانێ خوە ل وێ دەڤەرێ کربوو خوەدان و ھەتا نۆکە ژی خوە لێ دکەتە خوەدان.
مەحما خەلیل پەرلەمانتارێ بەرێ یێ ھەڤپەیمانیا کوردستانی د جڤاتا نوونەرێن عیراقێ دا بۆ ئەڤرۆ گوت” پشتی قۆناغا رزگارکرنا شنگالێ ژ تیرۆرستێن داعشێ، پێدڤیە پشتەڤانی د ھەموو بیاڤان دا بۆ وەلاتیێن دەڤەرێ بھێتە کرن و ژلایێ نێڤدەولەتی ڤە بھێتە پاراستن ب سەرپەرشتیا حوکمەتا ھەرێما کوردستانێ و پێدڤیەکا فەرە ژی شنگال ببیتە پارێزگەە کو ب ڤێ چەندێ دێ چەندین ماف و خزمەتگوزاری بۆ ھێنە کر نکو ئەڤ چەندە مە ژ حوکمەتا عیراقێ نەدیت، بەلکو تنێ حوکمەتا ھەرێمێ خزمەتگوزاری ل دەڤەرێ دکرن، لێ ژ بەر کو ژ روویێ کارگێری ڤە ھێشتا ب سەر حوکمەتا بەغدا و پارێزگەھا نەینەوا ڤەبوو، خزمەتگوزاریێن باش نە دگەھشتنێ، لەوما داخواز ژی دکەین بەرھەڤی بھێتە کر نکو ب زووترین دەم مادێ ١٤٠ بھێتە بجھئینان و شنگال ڤەگەریتەڤە ب سەر ھەرێما کوردستانێ ڤە”.
مەحما ب پێدڤی ژی دبینیت پشتی رزگارکرنا شنگالێ، ھەوا ئاڤەدانکرنا وێ بھێتە کرن و ب ھاریکاری و پشتەڤانیەکا نێڤدەولەتی، دیسا رەخنە ژی ل حوکمەتا عیراقێ گرتن کو ھاریکاریا وێ د ئاستێ پێدڤی دا نە بوو و چو کار ژی بۆ ناساندنا قرکرنا ب کۆم یا ئێزدیان وەکو جینۆساید نەکریە، و مە داخواز ژ سەرۆک وەزیران حەیدەر عەبادی کر کو پشکەکێ ژ بودجا گشتی یا عیراقێ بۆ ئاڤەدانکرنا شنگالێ بھێتە تەرخانکرن، لێ ئەڤ چەندە نەھاتە کرن و ئەڤ چەندە ژی بەرۆڤاژی وان ھاریکاریێن مەزن یا سەرۆکێ ھەرێمێ و حوکمەت و خەلکێ ھەرێما کوردستانێ بوو بەرامبەر کارەساتا شنگالی، دیسا ھەلویستێن سەرۆک کوماری فوئاد مەعسووم و سەرۆکێ جڤاتا نوونەران سەلیم جبوری ژی بەرامبەر کارەساتا شنگالێ د ئاستی پێدڤی دا نەبوون.
ناڤبری ئاماژە دا وێ چەندێ کو “پەرلەمانتارێ لیستا (موتەحیدون) عەلی جاسم متێوتی داخۆیانیێن بێ بنەما ئاراستەی کوردێن ئێزدی کرینە و ب داعشێ تۆمەتبارکرینە و ئەڤ داخوۆیانیە ھەڤدژی ھەردو مادێن ھەفت و ١٤ یێن دستوورێ عیراقێ نە و ب ناڤێ ھەموو ئاوارێن ئێزدی، دێ سکالایەکا قانوونی دژی وی تۆمار کەین”.
