گازیکرنا وەزیرێن دارایی و سامانێن سرۆشتی نەبوو لێپرسینێ یە
ئەڤرۆ، حکمەت زێوکی:
ئەندامەکێ پەرلەمانێ کوردستانێ رەت کر کو وەزیرێن دارایی و سامانێن سرۆشتی یێن حوکمەتا ھەرێما کوردستانێ ب ئارمانجا لێپرسینێ بۆ پەرلەمانی بھێنە گازیکرن، بەلکو ھەردو وەزیر ئەندامێن شاندێ دانوستاندنانە ل گەل بەغدا و گۆت “دێ ھێنە گازیکرن ژ بۆ دانا چەند راسپاردان”.
دلشاد شەعبان غەفار ئەندامێ پەرلەمانێ کوردستانێ بۆ رۆژناما ئەڤرۆ دیار کر کو رەنگە سێ شەمبیێ یان چارشەمبیێ ھەردو وەزیرێن دارایی و سامانێن سرۆشتی یێن حوکمەتا ھەرێمێ بھێنە مێڤانکرن و پرسا ئالۆزیێن ھەرێمێ و بەغدا بھێتە شرۆڤەکرن و رێک بکەڤین و چەند راسپاردان بۆ ھەردو وەزیران پێشنیاز بکەین، دا کو ل گەل شاندێ حوکمەتا فیدرالی گەنگەشە بکەن.
دلشاد شەعبان گۆت ژی “ئەز ب خوە نە ل گەل دانا ڤان راسپاردامە، چونکی ئەڤە دبیتە مایتێکرن د دەستھەلاتا حوکمەتێ دا، ئانکو کارێ پەرلەمانی ژ کارێ حوکمەتێ یێ جودایە”.
ھەژی گۆتنێ یە بەری نھا شوان قەلادزی ئەندامێ پەرلەمانێ کوردستانێ بۆ خەندان دیار کربوو کو رۆژا سێ شەمبیا بھێت ھەردو وەزیر ب ئارمانجا لێپرسینێ ل دۆر قەیرانا دارایی و سووتەمەنیان دێ بۆ پەرلەمانی ھێنە گازیکرن”.