گرانییا بازاڕی
رێژین حكمەت
گرانیا بازاڕی و بلندبوونا بهایێن پێدڤیێن سەرەكی یێن ژیانێ ئێك ژ مەزنترین و گرانترین ئاستەنگانە كو روو ب روی جڤاكی بووین، بەلێ مەترسی و زیانێن وێ یێن راستەقینە پتر دكەڤنە سەر ملێ تەخا هەژار و كێم دەرامەتان، ئەڤ دیاردەیە نە یا نهێنیە، بەلكو قەیرانەكە ڕۆژانە ژیانا خەلكێ ژ نەچاری دكەڤیتە دبن بارەكێ گرانڤە، هوكار و كارتێكرنێن سەرەكی كو دبنە ئەگەرێ پەیدابوونا ڤان قەیرانانن، بلندبوونا بهایێن كەرەستەیێن خوارنێ نە، كرینا پێدڤیێن بنەرەتی یێن وەك ئار و رۆن و شەكرێ بۆ خێزانێن هەژار دبینە بارەكێ گران، ژ بەركو پتریا داهاتێ وان بۆ دەرئێخستنا خوارنا ڕۆژانە دچیت.
هەروەسا كێمبوونا دەرفەتێن كاری ل گەل گرانبوونا ژیانێ دەرفەتێن كاركرنێ كێم دبن و بهایێ كارێ رۆژانە ل گەل بلندبوونا بازاڕی ناگونجیت، ئەڤە ژی شیانێن كڕینێ سنوردار دكەت، هەروەسا وەرگرتنا قەرزان ژ نەچاری، پترییا خێزانێن هەژار و كێم دەرامەت پەنایێ بۆ قەرزكرنێ دبەن بۆ دابینكرنا پێدڤیێن بنەرەتی، كو ئەڤە ژی ئاریشەیێن وان یێن دەروونی و جڤاكی كوورتر دكەت.
ژبلی ڤێ چەندێ كارتێكرنێن مەزن ل سەر پەروەردە و ساخلەمیێ ژی دكەن، خێزانێن كێم دەرامەت نەچار دبن دەستبەرداری هندەك پێدڤیێن گرنگ ببن، وەكو چارەسەریا نەخۆشیان یان هنارتنا زاڕۆكان بۆ خواندنێ ژ بەر نەبوونا شیانێن پارەی، بۆ كێمكرنا ڤێ بارگرانیێ، پێدڤیە لایەنێن پەیوەندیدار ب زویترین دەم دەستوەردانێ بكەن ب رێكا چاڤدێریكرنەكا توند ل سەر بازاڕان بۆ ڕێگریێ ل بلندكرنا بهایان، زێدەكرنا پشكێن خۆارنێ یێن هەیڤانە یان هاریكاریێن دارایی بۆ تەخێن هەژار، دابینكرنا دەرفەتێن كاری و پڕۆژەیێن بچووك بۆ پالپشتیا خێزانێن كێم دەرامەت و ل ڤێرە داخواز ژ رێڤەبەریا چاڤدێریا بازرگانی دهێتە كرن زێدەتر چاڤدێریا بازاڕی بكەن و دەلیڤەیێ نەدە نە چو كەسان بهایێن كەلوپەلێن خۆ گران بكەن، ب تایبەت ژی كەرەستەیێن خوارنێ كو ئەو ژێدڤیێن سەرەكی نە و رۆَژنانە خەلك پێدڤی ب كڕینا وان هەیە و هەر بازرگانەك و دكاندارەكێ تشتێ خۆ گران بكەت ل دووف یاسایێ سزابدەن، دا هندەكێن دی وێ جۆرئەتێ نە دەنە خۆ تشتێن خۆ گران بكەن.
