گـرفتێن ئـالـۆز یێن دەڤـەرێ ب درۆنان چـارەسـەر نابن
عـەمـەر هـەرگـوشـی
د دەمەكی دا كو شەڕێ د ناڤبەرا ئەمریكا و ئیرانێ دا راوەستیایە و دەڤەرێ هندەك ئارامی ب خۆڤە دیتیە، د ڤی دەمی دا بێی كو گەلێ كوردستانی نیازخرابیەك ل هەنبەر ئیرانێ هەبیت، ئیرانێ ب دو درۆنێن زۆر و ب لەز و ب هێز ب نیازەكا خراپ ئاراستەی بنگەهێ سەرەكی یێ سەرۆكێ حوكمەتێ كرن و بەرسڤا هەولێن ئاشتیانە یێن حوكمەتا هەرێما كوردستانێ ب درۆنان ڤە دا.
هەلبەت ب درێژاییا دەستهەلاتا حوكمەتا هەرێما كوردستانێ ل كابینەیێن ئێك ل دویڤ ئێك یێن كوردستانی هەمی هەولێن حوكمەتا هەرێمێ ئەو بوون كو هەرێم ل گەل جیران و هەمسایێن خۆ ب ئاشتی و ئارامی بژین و درێژێ ب پەیوەندیێن دۆستانە و برایانە بدەن ل سەر بنچینێ رێزا وەكهەڤ و بەرانبەر.
زۆر جاران نا دادپەروەری و زۆرداریا ل هەنبەر گەلێ كوردستانێ هاتیە مەشاندن، بەلێ هەر جار حوكمەتا هەرێمێ رێیا گفتۆگۆیێ و چارەسەریا كێشەیان ب رێیا ئاشتی و لێك تێگەهشتنێ یا هەلبژارتی و چو جاران پەنا بۆ تۆلە سەندنەوێ و بكارئینا هێزێ و چەكی نەبریە، ئەو ژی ئەگەرا هندێ بیە كو سەرباری ڤێ غەدرێ یا ل گەلێ كوردستانێ و سەروەریا خاكا وێ دهێتەكرن و چەقۆ دگەهتە سەر هێستكی، بەلێ هێشتا پەیوەندێن دیبلۆماسی دۆستانە ل گەل دەر و جیرانان دبەردەوامن و ژیانەكا هندەك نۆرمال بەردەوامیێ دكەت.
هەمی دزانن دەردێ ئیرانێ و چارەسەركرنا دۆخی و كێشا ئیرانێ ب رۆكێت و بۆمبان كو ئاراستەیی كوردستانێ بكەت چارەسەر نابن و برینێن وێ دەرمان نابن؛ زێدەباری ڤێ هندێ ژی دێ گرفتێن وێ ئالۆزتر لێهێن وەكی ماسیا ب تووڕێ دا كەفتی، هندی بزاڤین نەهەژی بكەت، دێ پتر تێ ئالیێت و هندی درۆنان ئاراستەی كوردستانێ بكەت پتر دوژمن دێ بۆ زێدەبن.
جهێ شانازیێ یە بۆ حوكمەتا هەرێما كوردستانی كو كاریە بنەمایەكی پتەوێ پەیوەندیێن دۆستانە و مرۆڤانە ل گەل وەلاتێن زلهێز و ئەورۆپا و دەڤەرێ دامەزرینیت كو د هەمی تەنگاڤیان و نادادپەروەریا دەنگێ هاوكاری و پشتەڤانیێ بۆ گەلێ كوردستانێ راگەهینن و هەمی كردارێن هۆڤانەیێن ناحەزێن میللەتێ مە شەرمزار بكەن، گەلێ كوردستانێ شانازیێ ب حوكمەتا خۆ دبەت كو كاریە جهەكێ تایبەت بۆ گەلێ كوردستانێ د كوربەندێن نێڤدەولەتی و بزاڤا دیموكرتیك دا دروست بكەت و بەرانبەر هەر درۆنەكێ ئاراستەی هەرێما كوردستانی و خەلكێ كوردستانێ بكەن هزار نەفرەتا ل درۆن هاڤێژا بكەن.
هەرێما كوردستانێ قووناغێن گەلەك سەختێن بڕینە و ب سیاسەتا ئاشتیخوازانەیا خۆ كاریە پارێزگاریێ ژ پەرلەمانێ كوردستانێ و حوكمەتا هەرێم و خەلك و خاكا خۆ بكەت، ئیرۆ ژ شەرمەزاری و روورەشیێ پتر تشتەك بۆ درۆنهاڤێژان نامینیت و گەلێ كوردستانێ ژی رۆژ ب رۆژ پشتەڤانیا نێڤدەولەیی یا بۆ زێدە دبیت و دۆزا رەوایا كوردستانێ ژی بەر ب ئاسۆیەكی گەش ڤە دچیت و ل بەندێنە ئاشتی و ئارامی و برایەتی بۆ هەتا هەتا سەربگریت و نەفرەت ل شەڕ و خوینرژتنێ بهێتە كرن.
