گه‌نگه‌شه‌یا ئاریشا گه‌نمێ جۆتیاران و ره‌وشا وه‌رگرتنێ ل سایلۆیان دهێته كرن
ئه‌ڤرۆ نيوز، نيوار محه‌مه‌د سه‌ليم:
لژنا چاندن و ژێده‌رێن ئاڤێ ل جڤاتا پارێزگه‌ها دهۆكێ مێڤانداریا شانده‌كێ تایبه‌ب ل دۆر ره‌وشا سایلۆیان مێڤان كر و تێدا گه‌نگه‌شه‌كا درێژ ل دۆر ره‌وشا جۆتیاران و چاوانیا گه‌نمێ جۆتیاران هاته كرن.
سه‌باح بابیری، سه‌رۆكێ لژنا چاندن و ژێده‌رێن ئاڤێ ل جڤاتا پارێزگه‌ها دهۆكێ بۆ ئه‌ڤرۆ نيوز راگه‌هاند كو لژنا وان مێڤانداریا رێڤه‌به‌رێ گشتی یێ چاندنێ و رێڤه‌به‌رێن سایلۆیێن فه‌یدیێ و زاخۆ و شێخان، دیسا رێڤه‌به‌ریێن چاندنێ یێن قه‌زایێن سێمێل و زاخۆ و به‌رده‌ره‌ش و شێخان كرن بۆ دانوستاندنێ ل سه‌ر نه‌هێلانا دیاردا فرۆتنا به‌هرا خوه یا جهێ گه‌نمی و ئه‌و به‌هرا جهی ژ لایێ به‌غدا ڤه دهێته ده‌ستنیشانكرن بۆ به‌غدا و ئه‌و پارێ مایی ژ 2014 هه‌تا 2018ێ یێ جۆتیاران.
سه‌رۆكێ لژنا چاندن و ژێده‌رێن ئاڤێ ل جڤاتا پارێزگه‌ها دهۆكێ ئاشكه‌را ژی كر كو د ڤێ كۆمبوونێ دا ئه‌و گه‌هشتنه چه‌ند راسپارده‌كا كو لژنا چاندنێ ل گه‌ل وه‌زاره‌تا چاندنێ ل هه‌رێما كوردستانێ و لژنا چاندنێ ل په‌رله‌مانێ كوردستانێ و نوونه‌رێن ئوفیسا دهۆكێ یێن جڤاتا نوونه‌رێن عیراقێ ئه‌و بابه‌تێن گرێدایی ب وان ڤه گه‌نگه‌شه بكه‌ین و دووڤچوونێ بكه‌ین.
سه‌باح بابیری خۆیا ژی كر كو ل دۆر بابه‌تێ فرۆتنا به‌هرا خوه یا جهی گه‌هشتنه وێ چه‌ندێ كو هه‌ر رێڤه‌به‌ریه‌كا چاندنێ ل سه‌ر ئاستێ قه‌زایێ نموویه‌یێن دووڤچوونێ بهێنه وه‌رگرتن و ئه‌و كه‌سێن به‌هرا خوه یا جهێ گه‌نمی د فرۆشن بهێته ده‌ست نیشانكرن.
