گوندی ژ بەر تۆپبارانا ئیرانێ ئاوارە دبن
ھەولێر، قائید میرۆ:
ژ ئەگەرێ تۆپبارانێن رۆژێن بۆری یێن سنوورێ قەزا چۆمان ڤەگرتی ھژمارەکا وەلاتیان ئاوارەبووینە و قایمقامێ قەزا چۆمان ژی ئاماژە ب ڤێ چەندێ دکەت کو زۆربەیا وەلاتیێن ئاواربووی کۆچەرن و ھندەک ژی ب مەرەما چاندنا ئەردێ خوە چووینە سەر گوندێن خوە.
ئەحمەد قادر، قایمقامێ قەزا چۆمان بۆ ئەڤرۆ نیوز دیار کر، ژ ئەگەرێ تۆپبارانا چەند رۆژێن بۆری ژ لایێ کۆمارا ئیسلامیا ئیرانێ ڤە بۆ سەر دەڤەرا چۆمان زیانێن مەزن یێن مادی گەھشتینە وەلاتیێن ھەرێما کوردستانێ و ترس و دودلی بۆ گوندێن سەر سنووری پەیداکریە، ب تایبەتی ھژمارەکا زۆرا وەلاتیان ب مەرەما چاندنا ئەردێ خوە ڤەگەڕیاینە سەر گوندان و ھندەک ژی مژوولی خودانکرنا پەزینە و کۆچەرن ھەموو ژ بەر تۆپبارانێ ئاوارەبووینە.
ئەحمەد قادر ئاماژە ب وێ چەندێ ژی کر کو چەندین جاران وان داخواز ژ چەکدارێن پەکەکێ و ھەموو لایەنێن دی یێن دەڤەرێ کریە سنوورێ ھەرێما کوردستانێ نەکەنە مەیدانا ئێکلاکرنا ھەڤڕکیێن خوە دگەل وەلاتێن جیران داکو نەبیتە بەھانەیەک بۆ تۆپبارانکرنا گوندێن ھەرێما کوردستانێ و گۆت: “بەلێ مخابن سالانە ژ لایێ ولاتێن جیران ڤە سنوورێن ھەرێما کوردستانێ دبیتە ئارمانجا فڕۆکە و تۆپخانێن وان و زیانێن مادی و گیانی ژی بۆ ھەرێما کوردستانێ ھەنە”.