گژلوکێ ٥٠% زیان گەھاندیە چاندن و دەرامەتێ ئامێدیێ
ئەڤرو نیوز ، نەوزاد زادە ھلوری:
چەند رۆژان بەریا نھا شەپولەکا گژلوکا ب ھێز ب سەر دەڤەرا ئامێدیێ دا ھات و نێزیکێ سێ دەمژمێران ڤەکێشا ، زیانێن زۆر ب دار و بارێ بەرھەمدار و دەرامەت و چاندنا ئامێدیێ ب گشتی گەھاند ، ئەڤێ یەکێ ژی جوتیار دلگران کرن.
ستار خورشید بەرپرسێ بنگەھێ شیرەتکاریا چاندنێ ل دێرەلوکێ بۆ ئەڤرو نیوز گۆت: (ھەر چەندە چوو داتایێن فەرمی لبەر دەستێ مە نینە کو زیانێن گژلوکا چەند روژێن بوری ب خەملینین کا چەندبوویە لسەر چاندن و دار و بار و دەرامەتێ دەڤەرا ئامێدیێ ب گشتی ، بەلێ دکارین بێژین کو ئەوێ گژلوکێ نێزیکێ ٥٠% زیان ب چاندن و دار و بار و دەرامەتێ دەڤەرا ئامێدیێ گەھاندیە)
زێدەتر گۆت: (ئەم دێ بزاڤێ کەین کو خەملاندنەکا ھویر ل بارا ئەوان زیانان بزانین و دوڤدا دێ بو لایەنێ پەیوەندیدار بلند کەین و ھیڤیە جارەک دن لایەنێن شولەژێ ھەڤکاریا ئەوان جوتیاران بکەن ڤە چونکی ھەر بوو نموونە زیان ب مێوێن تری و دارێن خوخ و سێڤ ، و دیسان شتلێن چاندن و دەرامەتێ دن گەھاندیە و دبیت ئەڤ سال رێژەیا پرانیا جورێن دەرامەت و چاندنا دەڤەرێ بەرامبەر سالێن بوری کێمتر بیت)
بەرپرسێ شیرەتکاریا چاندنێ ل دێرەلوکێ دیارکر ژی کو ژبلی گژلوکێ د ھەمان دەم دا سر و سەرمایێ ژی کارتێکرنەکا زۆر لسەر دەرامەت و چاندنێ ل قەزا ئامێدیێ و دەڤەرێ ھەبویە و گۆت ژی: (ژ ئەگەرا نزمبوونا پلەیێن گەرمایێ د چەند وەخت و جھێن جوداجودایێن سنوورێ دەڤەرا ئامێدیێ پشکەکا زور یا چاندن و دەرامەت و داروبارێ دەڤەرێ توشی سروسەرمایێ بویە و کارتێکرن لسەر بەرھەمی َوان کریە)
