گۆتن و کریارێن دەستهەلاتێ ل دۆر پرسا کوردی گەلەک ژێک دوورن
ئەندامەکێ پەرلەمانێ تورکیا دیار کر سەرۆک کۆمار و بەرپرسێن حوکمەتێ بەحسێ چارەسەرکرنا پرسا کوردی دکەن لێ کەسێن ب دەنگێ خەلکی هاتینە هەلبژارتن ژ کار دوور دکەن، ژ ئالیەکێ دبێژن کۆمارا تورکیا یا کورد و تورکانە و ل ئالیێ دی زۆرداریێ ل سەر گەلێ کورد ژی رۆژ ب رۆژێ زێدەتر دبیت.
سڕی ساکیک ئەندامێ پەرلەمانێ تورکیا سەر ب فراکسیۆنا دەم پارتی ل پەرلەمانێ تورکیا ئاخڤی و دیار کر، ب فەرمانا وەزارەتا ناڤخوە هەڤسەرۆکێن باژێرڤانیان ئەوێن ب دەنگێ خەلکی هاتینە هەلبژارتن ژ کاری دوور دکەن و ب جهێ وان جارەکا دی قەیووم هاتنە دانان، لێ کەس دەنگێ خوە ناکەت، زۆرداریەکا گەلەک مەزن ل سەر گەلێ کورد هەیە و گۆت: (بەری چەند رۆژان سەرۆک کۆمارێ تورکیا دیار کر کۆمارا تورکیا تنێ یا تورکان نینە و کۆمارا کوردانە ژی، هەکە کۆمار یا کوردان بیت بۆچی هوون ل دژی پەروەردا ب زمانێ کوردی نە، هەکە کۆمار یا کوردانە بۆچی هوون زۆرداریێ ل کوردان دکەن، ب هزاران سیاسەتمەدارێن کورد ل زیندانان دانە و هوون بەحسێ براتیێ و ئاشتیێ دکەن، چاوا دێ گەلێ کورد باوەریا خوە ب گۆتنێن هەوە بینیت).
ناڤهاتی ئەو یەک ژی دیار کر، مخابن گۆتن و کریارێن بەرپرسێن تورکیا گەلەک ژێک دوورن، هەکە هەوە بڤێت پرسا کوردی بهێتە چارەسەرکرن و شەڕێ چەندین سالێن بۆری ب دووماهی بهێت دڤێت هوون دەست ب قۆناغەکا نوو بکەن، ئاشتی و چارەسەریا پرسا کوردی تنێ ب گۆتنان نابیت دڤێت ب کریاری هوون هندەک تشتان بکەن، لێ مخابن هەتا نها ب کریاری چو نەهاتیە کرن و ئێدی باوەریا گەلێ کورد ژی ب گۆتنێن هەوە نەمایە، دڤێت دەستهەلاتا نها راستیا هەی قەبوول بکەت، رێزێ ل ئیرادا گەلێ کورد بگریت، دڤێت هەموو گرتیێن سیاسی بهێنە ئازاد کرن، هەتا ئەو یەک نەهێتە کرن باوەریا گەلێ کورد ژی ب ئاخڤتنێن بەرپرسێن نها یێن تورکیا ناهێت.
سڕیی ساکیک سەبارەت ب هەلوەستێ سەرۆکێ پارتا بزاڤا نەتەوەپەرست ل دۆر ئاشتیێ ژی دیار کر، ئاخڤتنێن بەرێز باخچەلی جهێ رێزێ نە، لێ دڤێت هندەک کار بهێنە کرن دا کورد ژی باوەر بکەن هەوە دڤێت هندەک تشتان بکەن، مخابن تشتێ هەتا نها هاتیە کرن تنێ ئاخڤتنە و هەکە ئەم بەرێ خوە بدەینێ گۆتنێن خوەش دبێژن لێ ب کریاری ل دژی گۆتنێن خوە نە، دبێژن ئاشتی و ئەو توندوتیژیێ ل دژی گەلێ کورد بکار دئینن، بەحسێ براتیێ دکەن و نوونەرێن کوردان ل زیندانان دانە، بەحسێ پێکڤەژیانێ دکەن لێ هەتا نها ژی بچووکترین مافێ ژیانێ بۆ گەلێ کورد ل تورکیا رەوا نابینن، د دەمەکێ وەسا دا چاوا دێ پرسا کوردی هێتە چارەسەرکرن، بێگومان کورد ڤێ یەکێ قەبوول ناکەن.
