گۆرین بكۆم یێن خه‌لكێ گوندێ حه‌ردان ل شنگال دێ هێنه ڤه‌كرن
دهۆك، له‌زگین جوقی
ئێك ژ قوربانیێن خه‌لكێ گۆندی حه‌ردان دیار كر:” دهێته چاڤه‌ركرن ل رۆژا 22/2/2022ێ گۆرێن بكۆم یێن گوندێ حه‌ردان بهێنه ڤه‌كرن ل جینوسایدا شنگال 3/8/2014ێ پتر ژ 500 كه‌سان ژ خه‌لكێ گوندێ حه‌ردان هاتنه ره‌ڤاندن و بێ سه‌روشینكرن ژلایێ تیرۆرستێن داعش ڤه”. ئه‌ندامێ ده‌سته‌یا ڤه‌كۆلین و كۆمكرنا به‌لگه‌نامه‌یان ل پارێزگه‌ها دهۆكێ بۆ ئه‌ڤرۆ راگه‌هاند: 82 گۆرێن بكۆم یێن هاتینه دیتن و دیكومێنتكرن، سه‌رانسه‌ری قه‌زا شنگال سه‌رجه‌مێ ڤان گۆرێن بكۆم هه‌تا نوكه 20 گۆرێن بكۆم یێن هاتینه ڤه‌كرن و هه‌تا نوكه ناسنامه‌یێن 145 رۆفاتێن ناڤ گۆرێن ب كۆم دا ئاشكرابووینه و هاتینه راده‌ستكرن بۆ كه‌س و كارێن قوربانیان”.
سه‌عید ته‌لال، ئێكه ژ قوربانیێن خه‌لكێ گوندێ حه‌ردان ل شنگال ب ئه‌ڤرۆ دیار كر:” ل جینوسایدا شنگال 43 كه‌س ژ مالباتا مه هاتینه ره‌ڤاندن و بێ سه‌روشینكرن هه‌تا نوكه چاره‌نڤیسێ 30 كه‌سان ئاشكرابووینه یێن هاتینه رزگاركرن، لێ هێشتا چاره‌نڤیسێ 13 كه‌سان ژ مالباتا مه دیار نینه، گه‌له‌ك خێزانێن دی یێن گوندێ حه‌ردان هه‌نه و 10 كه‌س و 14 كه‌س ژ خێزانێن وان چووینه بێ سه‌روشین بووینه، ئه‌م هیڤدارین هه‌موو گۆرێن بكۆم بهێنه ڤه‌كرن دا كو چاره‌نڤیسێ بێ سه‌روشینكریان ئاشكرابیت”.
ئاماژه دا وێ چه‌ندێ ژی:” ئه‌ڤه چه‌ند سال ب سه‌ر جینوسایدا شنگال ڤه چوون، هه‌تا نوكه خه‌لكێ تشته‌كێ ژ چاره‌نڤیسێ ژن و زارۆكێن خۆ نزانن، ب تنێ ل گوندێ حه‌ردان پتر ژ 500 كه‌سان ژ هه‌ردوو ره‌گه‌زان ژلایێ تیرۆرستێن داعش ڤه هاتنه ره‌ڤاندن و بێ سه‌روشینكرن، هه‌تا نوكه ژی چاره‌نڤیسێ گه‌له‌ك كه‌سان دیارنینه و هنده‌ك ژی یێن هاتینه رزگاركرن”.
سه‌یدو قاسو، ئێكه ژ وه‌لاتیێن گوندێ حه‌ردان دیار كر:” نوكه ل گوندێ حه‌ردان به‌رهه‌ڤیێن كرینه بۆ ڤه‌كرنا گۆرێن ب كۆم یێن دوریانا حه‌ردان هه‌روه‌سا دگه‌ل ڤی پێنگاڤێ دا ئه‌م دخوازین كچ و ژن و زارۆكێن ئێزدی یێن هه‌تا نوكه بن ده‌ستێ خێزانێن تیرۆرستێن داعش دا نه‌خاسمه ژی ل كه‌مپا هۆلێ بهێنه رزگاركرن”.
فه‌لاح حه‌سه‌ن، ئه‌ندامێ ده‌سته‌یا ڤه‌كۆلین و كۆمكرنا به‌لگه‌نامه‌یان ل پارێزگه‌ها دهۆكێ بۆ ئه‌ڤرۆ راگه‌هاند: 82 گۆرێن بكۆم یێن هاتینه دیتن و دیكومێنتكرن، سه‌رانسه‌ری قه‌زا شنگال سه‌رجه‌مێ ڤان گۆرێن بكۆم هه‌تا نوكه 20 گۆرێن بكۆم یێن هاتینه ڤه‌كرن و هه‌تا نوكه ناسنامه‌یێن 145 رۆفاتێن ناڤ گۆرێن ب كۆم دا ئاشكرابووینه و هاتینه راده‌ستكرن بۆ كه‌س و كارێن قوربانیان”.
ئاشكه‌را كر:” دناڤ 20 گۆرێن ب كۆمدا 325 رۆفات هاتبوونه دیتن و راكرن هه‌موو بۆ نوژداریا داد ل له‌غدا هاتبوونه هنارتن، هه‌تا نوكه ب تنێ ناسنامێن 145 رۆفاتان ئاشكرابووینه و هێشتا ناسنامێن 180 رۆفاتێن قوربانیێن جینوسایدا شنگال ل نوژداریا داد ل به‌غدا ماینه هێشتا ئاشكرانه‌بووینه”.
ل جینوسایدا شنگال ل سالا 2014ێ پتر ژ شه‌ش هزار كه‌سان ل شنگال هاتنه ره‌ڤاندن و بێ سه‌روشینكرن ژلایێ تیرۆرستێن داعش ڤه، هه‌تا نوكه ب هه‌ڤكاریا نڤیسینگه‌ها رزگاركرنا ره‌ڤاندیێن ئێزدی پتر ژ سێ هزار 550 ره‌ڤاندیێن ئێزدی ژ هه‌ردوو ره‌گه‌زان یێن هاتینه رزگاركرن و هێشتا چاره‌نڤیسێ پتر ژ دوو هزار و700 ره‌ڤاندییان دیار نینه.
